Echo…

Hüt ischs früeh losgange, am 8i hämer scho müesse im Spital si für en Herzultraschall. Nöd mal glanged für en Kaffi, au will de Liam hät müesse nüchtern si und er susch au öppis het welle trinke. I de Nacht am 3 häter wäg dem au no Sondenahrig und sis Benadryl becho.  Mir händ dä glich no chli müesse warte und sind dä schlussändlich am 20 ab achti abholt worde für de Ultraschall. Am Liam hät aber s warte nöd so viel usgmacht, im Warteruum häts es Aquarium mit Fischis gha.

I dem Zimmer isches Iischalt gsi und es isch fascht e Stund gange, de Liam hät das nöd gstört, obwohler halb nackt döt gläge isch. Sie hät irgend fascht 200 Bilder gmacht.

Es isch ja eigentli alles top modern aber bi de Fernseh sind irgendwie up-to-date.

Dä isches wieder id Ocean Clinic gange in 8. Stock. Mir sind dä id Infusions Abteilig gfüehrt worde. Döt händs sini Vitalwärt prüeft und dä ischs au scho is OP Zimmer gange für d Lumbal- und Chnochemarkpunktion. Döt hät de Anästhesist (schwierigs Wort) paar Frage gstellt und de Liam isch is Träumliland gleitet. Mir händ dä in Vorruum döfe warte, gad gnueg Zit gsi zum Zmorge und en Kaffi hole. Schlimm aber i dere churze Zit hämer scho Goldstatus erreicht.

Chum bini wieder dobe gsi isch de Liam au schowieder usecho. Das isch chum 10 Minute gange. De Liam hät dä aber gfunde er macht gad no es Nickerli, d Schwöster hät aber öppis degäge gha und en rächt unsanft gweckt. Er hät dä eifach ufem Arm vo de Tiffany witer pfused.

Woner wach gsi isch, häter dä chli Hunger gha, hät ja au no nüt gässe, i dere Zit isch s Ambisome am laufe gsi. D Mary vo de Ernährigsberatig isch no verbi cho und hät eus nomal gseit mir sölled doch luege daser meh Protein isst. Es ischne würkli wichtig da, das d Chind usgwoge ernährt werded.

Nachem Ambisome hämer dä zwei Stund nüt gha und sind mal richtig Hauptstrass glofe. Will de Liam aber unbedingt hät welle mit sim Buggy laufe, hämer statt 10 Minute öppe 45 Minute gha aber mir händ ja Zit gha.

 

 

 

 

 

 

Nach dem Marsch, häts dä wohlverdienti Burger und Pommes gäh.

Am Namittag isch dä Schuelbank drucke agseit gsi, Homecare. Mir händ Sache glernt, wofür i de Schwiiz gad en Chopf chürzer wärsch, wänns würsch selber mache.

Zerscht händs eus zeigt wie mir, täglich dihei, müend beid Lume vom Hickman Katheter spüehle mit NaCL und Heparin. Das hämer dä ame Dummy müesse vorfühere, quasi als Prüefig. Natürlich beid mit bravour bestande, händ ja i de Schwiiz au de Beste chöne über d Schultere luege.

Nachher hät sie eus no zeigt wiemer de Hickman Verband sölled wächsle, das dä eimal wüchentlich. Da döfemer dä am Mittwuch e Prüefig ablege. Sie händ alles so gnau erchlärt und zeigt, dass das ganze irgend zwei Stund gange isch.  Für Tiffany isch en chline Traum in erfüllig gange und sie döf äntli das mache, wo sie i de Schwiiz nie hät döfe. 🙂

De Liam isch i dere ganze Zit entweder im Buggy gsässe und oder hät sich susch irgendwie sälber beschäftigt mit umelaufe und erchunde. Es stuhned all wie guet er mitmacht und wiener amigs seeleruig döt hockt und au kei angst hät, wills e anderi sprach reded.

Im Spital händs hüt no Gschänkli verteilt, mir händ das irgendwie verpasst, dä hät de Rainer (Dolmetschter )extra no gluegt, dass de Liam au no öppis bechunt, die händ das sogar dä extra no verbi bracht, so lieb. Willmer hüt relativ viel Termin gha händ, isch de Dolmetschter wieder cho. De Rainer hät aber nöd all zu viel z due gha, ab und zue mal es Wort woner eus hilft. Er hät de plausch am Liam und hät immer öppsi interessants zum verzelle, so gaht de Tag au schnäller ume. Daser au es Bild händ, vo wem mir reded, de Rainer mitem Liam vorem Wiehnachtsbaum bim Igang.

Bim uselaufe hämer dä no zwei Cops atroffe und gfunde es wär doch no herzig wänn de Liam es Foti mit dene macht, sie händen dä churzerhand gad zum Officer ernännt.

Mit dem Ändet de hütig Blog au und i de Schwiiz hät de Tag schowieder agfange.

Guet Nacht…

ps. Kommentär schriebe sött jetzt gah.