Pike Place Market…

Mir händ ehner e churzi Nacht gha. De Liam isch sehr unruihig gsi, am halbi 3 hämerem dä Oxycodon gäge d Schmerze gä. Nachher hät er dä viel besser gschlafe, Tiff häts dä am 4 irgendwie packt und sie hät no churz ihres Büro göffnet und paar Telefon gmacht. Sie isch dä aber am halbi 9i glich ihri neue Schueh go teste. Ich ha dä mal mini Mails checked, mir händ gester de Heidi no gschriebe wägem zahne. Sie hät am 09.15 Uhr gantwortet, Dr. Gardner welli dasmer ine chömed uf die 10.15 Uhr, dass s Bluet chönd teste und de Chli chönd aluege. Tiff isch no am jogge gsi und hät dä chli müesse gas geh, dassmers rächtzitig schaffed. Mir sind dä tatsächlich am 10.15 Uhr i de Mountain Clinic gstande, händ döt aber dä müesse 3/4 Stund warte bis Bluet händ chöne abneh. De Musiker vo vor 2 Wuche isch au wieder cho und hät chli für de Liam gspielt. Das hätten aber nur churz ufgstellt.

Bluet neh isch dä e churzi Sach gsi, gmacht häts e Studentin vo Spokane, sie macht es einmonatigs Praktikum im Children’s.

Nachher häts wieder gheisse warte im volle Wartezimmer. De Liam hät dä nöd welle dasmer anehocked, das häts scho öppe die gä, willer hät welle gah aber er hät dä nüm ufghört brüele. Mir händen gfrögt ober use wott oder zu de Tiffany aber bi allem isch es Nei zrugcho. Er hät sich afange winde im Buggy, dä hämer ihn usegno aber er hät sich nöd beruige lah. Er hät immer abe welle aber weder stah no sitze isch guet gsi. Es isch 11.00 Uhr gsi und am viertel ab hettemer Termin gha mit de Ärtzin. Ich bin dä go fröge obs d Ärztin chönd hole, mir chönged jede Moment hindere häts dä gheisse. De Liam hät sich vor Schmerze am Bode gwälzt, so hämeren glaub no nie gseh. Er hät vo eus dä Oxycodon übercho und mir sind dä äntli is Untersuechigszimmer bäte worde, d Nurse hät no gfröged ober uf d Waag chöngi stah, hm glaub weniger. Im Zimmer hät er sich immerno so gwindet und krümmt. Und plötzlich so schnäll wies cho isch, ischs weg gsi, s Schmerzmittel muess gwürkt ha. Es isch ja au e super starchs Mitteli. Er hät sich dä wieder beruigt und isch dä nachher au no uf d Waag gstande und sie händ de Bluetdruck chöne mässe. De isch nöd mal so höch gsi.

Mir sind glaub gad 3 Jahr galtered i dene 15 Minute. Es isch richtig herzzerissend gsi ihn so müesse z gseh. Irgendwänn isch dä au mal d Ärztin cho. Sie häten dä untersuecht. Sie hät dä gmeint, es seg scho röter bim Zahfleisch und d Bagge seg chli gschwulle, obs jetzt wägeme neue Zah seg oder susch en Entzündig chöng sie nöd säge, sie verschribi aber es Antibiotikum. Sie ischs dä aber no mit eusere Ärztin de Dr. Gardner go bespräche, sie welli nüt falsch mache, willer ja bald Zälle sött übercho. Nach e paar Minute isch sie dä wieder cho und hät dä au Bluetwert debi gha. Bluetplättli und s Hemoglobin (rote Bluetkörperli) sind stabil blibe, hät ja au erscht grad Bluetplättli becho. De Chräbs isch jetzt au wieder im Bluet nachwisbar, aso hät eus euses Gfühl nöd tüscht. Scho krass, dass mer das bi ihm so guet merkt und sis gmüeht gad so anderscht isch. Es seg aber normal, seg ja au scho wieder 3 Wuche her sit de letschte Chemo, mir ischs dä gsi, dasses nonig so lang her gsi isch und hät mi stutzig gmacht aber ha ja dä im Blog chöne go nalese, isch erscht 2 Wuche her. Isch ja scho kei all zu hefitigi Chemo gsi und hät d Leukämie ja nur sölle in Schach halte aber es zeigt eim wieder wie schnäll dases gaht, wämer nüt macht. S verschribene Medikament hämer dä erscht am Namittag chöne go hole, sie tüends immer individuell uf jede Patient abfülle.

Mir händ also chli Zit gha. Willmer no nie richtig in Downtown gsi sind und ja zurzit es Auto händ, simer also zum Pike Market Place mitte i de Stadt. Das isch näb de Space Needle so dä Touri Ort.

Parkiert müemer öppe a de steilste Strass vo Seattle parkiert ha. Ufem Foti chunts halt nöd so übere, gwindet häts dä au no relativ fescht aber defür mal nöd grägnet. 🙂

Euse Wäg hät eus am allererste Starbucks verbi gfüehrt, 1st and Pike dä gits sit 1971, gnau de glich Kaffi und ganz chli aber so öppis vo pumpe volle. De normal Kaffi wo i de Starbucks Getränk dine isch, heisst au Pikes, zumindest da i de USA. Mir sind dä aber witer, händ ja euse Kaffi scho im Spital gha.

Überall häts Strassemusiker mit Gitarre gha, dass hät am Liam natürli pässled.

Es hät dä mehreri Markthalle gha mit früsche Läbensmittel und allerlei Krimskrams. Wür glaub immer döt go ichaufe, wänni da wür wohne. 😛

E Bierstube häts au no gha. 🙂

Mir sind dä döt überall chli umegschländered und schlussändlich im Athenian zum Zmittag glandet. Es uralts Fischrestaurant wos irgend scho sit 1905 git.

Nöd de Tiffany ihre liebligs Spot, eus andere häts aber gfalle und s Ässe isch au fein gsi. Bim inegah isch eine uf de Leitere gstande, das hät de Liam völlig fasziniert und er hät allne zuegschroue “de Ma isch ufem Dach obe”.

Am Tisch acho, hät de Liam wie wild afange male, es isch gad wieder chli e besseri Phase gsi. Gässe häter nüt aber au keis Wunder bi sinere Bagge, immerhin trinkter immerno schön.

Er isch dä aber wieder schnäll müed worde und isch im Sitze igschlafe.

Mir händ am Liam dä no en Glückspenny useglah. Und ich han mir no welle mini Zuekunft vorussäge lah aber de doof Chaschte hät mi voll abzockt. En Marktverchäufer hät eus no gfröget vo wo mir seged und hät dä gmeint mer nänni de Staat Washington au d Schwiiz vo de USA, wäg de Berge rundume.

Zum Abschluss simer dä no bim goldige Säuli glandet, es isch es riese Sparsäuli, s Geld gaht zugunste vo Gassechuchene, Seniore Wohnheim, Primarschuele und Klinike.

Nachere 20 minütge Fahrt, simer dä wieder im Spital gstande, zum d Medis go abhole. Nach witere 5 Minute simer Dihei gsi, de Liam hät dä gad welle go anelige.

D Ärztin häts hüt au nomal gseit, es seg jetzt gad en guete Zitpunkt für d Chemo und d’Infusion, es machtem im moment scho wieder chli meh zschaffe. Aber gigele und Seich mache häter vorem ischlafe glich no möge mache.

Guet Nacht…

 

 

Shoes…

Tiffany isch hüt wieder früeh use zum go jogge zga, sie isch aber bi de erste Chrützig wieder umkehrt, es heg sie fascht devo gwindet und grägnet häts au no. Am 9i simer dä losgfloge richtig Spital, de Liam hät wieder gnau glich ta, wie wo mini Eltere s erscht Mal mitcho sind in Spital. Nöd in Buggy, nöd laufe, sondern träge und zwar nur vom Mami, es isch dä en erbitterte Kampf zwüsche Tiffany und Liam usbroche, wer de sturer Chopf hät. Tiffany hät sich dä nacheme wili aber duregsetzt.

Im Spital acho, isch d Tiffany scho uf d Mountain Clinic gange, sit dem Wuchenend chamer sich diräkt im 8. i de Mountain Clinic amelde und muess nöd no zerscht in 6. D’Uschi, de Reto und ich händ i dere Zit uf de Kaffi gwartet im Starbucks. Womer dä au dobe acho sind im 8. hät eus die Dame bim Empfang gseit, das sie Tiffany id Ocean Clinic ufem gliche Stock gschickt hät, mir händ dä döt uf Tiffany und de Liam gwartet, nachere viertel Stund warte, bini dä mal go fröge, ob de Liam döt seg, sie hät dä gseit, es seg niemer bi ihne im Lab wo so heisst. I dem Moment isch dä Tiffany z laufe cho und hät vo ihrere eigene Odyssee verzellt. Sie isch in 8. id Mountain Clinic, vo döt au id Ocean Clinic, döt isch sie dä in 6. abe gschickt worde und im 6. isch sie dä wieder id Mountain Clinic gschickt worde im 8. und döt wär sie eigentli vo Afang a richtig gsi. Es cheibe durenandn isches gsi.

S Bluet isch dä aber ufem Wäg is Labor gsi und mir händ chöe go Zmorge ässe. De Liam hät richtig appetit gha und hät chli vo allem probiert, Späck, Pancakes, Rüehrei, Herdöpfel. S Zmorge isch Spital isch ächt guet.

Uf die 10.45 Uhr simer dä wieder id Clinic ufe und händ döt no chli gwartet. De Liam hät dä d Nurses chli unterhalte, als Dank häts dä Stickers gä.

Er hät dä churz au no gmeint er seg es Ralph Laurent Model. D Pose hät er emal scho voll druf.

De Liam hät dä, wie erwartet, Bluetplättli brucht. Das hät dä nomal öppe e Stund brucht bis die cho sind, zum Glück isch gad no Football glofe.

Am 13.30 simer dä fertig gsi und sind wieder Hei glofe.

Will Tiffany ja jetzt scho fascht als Profi duregaht, hät sie mal aständigi Rennschueh bruecht. De Matt hät eus gester no gseit, dass Brooks (Rennschueh Marke) ihre Hauptssitz in Seattle und en Lade hät wos Laufanaylse abütet. S Wätter isch hüt ganz kurlig gsi, mal Räge, mal Sunne, mal Sturm.

Tiffany isch dä verkabled worde und hät ufs Laufband müesse, ohni Schueh.

Mit Schueh isch sie dä chli im Lade umejogged. De Liam hät das sauglatt gfunde, er hät gmeint er spieli fangis mitem Mami, die isch dä aber plötzli weg gsi.

De Liam hät sich dä schnäll wieder i sinere Liebslingsabteilig wiedergfunde.

Nachdem dä Tiffany mit guete Schueh usgrüstet gsi isch, simer näbedra ines Cafi no öppis go trinke und chlises ässe. Es mega cools Cafi, hät sogar no Schaukle gha zum höckle, hät de Liam natürli cool gfunde.

Bi de Heifahrt hämer dä no gseh, dass döt no es paar herzigi Restaurants hät, vilicht verschlahts eus ja nomal döt ane. Schint eh e kreativs Viertel z si.

Ganz i de nöchi döt sind au Teil vo “Sleepless in Seattle” und “10 Dinge, die ich an dir hasse” dreht worde.

Womer am U-Village verbi gfahre sind, hämer no eine entdeckt, wo ehner en eigewillige Parkpaltz gwählt hät.

Dihei hät Tiffany ihri neue Schüehli no vorgfüehrt, sowie au de Liam.

De Liam hät dä no en cheibe spass dra gha, eus chli Nass zmache, bzw. sich sälber. 🙂

Irgendwie häter aber immer wieder so Phase wosem nöd so guet z gah schint, eus isch dä ufgfalle, dass er chli e roti Bagge hät links. Mir händem dä is Mul gluegt und es gseht so us, als wür en neue Zah durestosse, villicht ischer au drum chli ahänglicher und empfindlicher als au scho. A so normals Züg dänktmer irgendwie scho gar nüme.

Vorem is Bett gah, häts de Photograph i ihm gweckt und er hät agfange wild druflos fötele.

Nachher isch dä aber Bettzit gsi, drum

Guet Nacht…

Pancakes…

Während Tiffany wieder ihri morgentlich Velotour gmacht hät, han ich mich wieder mit administrativem Zügs umegschlage. Womer dä all parat gsi sind am 09.30 Uhr hämer dä eigentli welle is Portage Bay Cafe go Zmorge ässe, d Lüt sind aber bis uf d Strass use agstande, nöd de best Ort für es Chind wo neutropen isch. Tiffany hät ufem wäg döt ane no en Lade entdeckt.

Mer gsehts ufem Bild nöd guet, de Lade heisst vielsagend, Joint. Wiemer am Abig erfahre händ, ischs in Washington legal Cannabis z chaufe und konsumiere. Ich ha immer gmeint, dass seg einzig in Colorado de Fall.

Mir sind dä wieder i eusi Hood, U-Village. Mir händ dä es ruihigs Plätzli im Eureka! gfunde. De Liam hät eigentli unbedingt Pancakes welle aber leider isch d Zmorgecharte sehr begränzt gsi und es hät kei gä.

Er hät dä aber es ussergwöhnlich starchs bedürfnis nach Herdöpfelhut becho. D Herdöpfel sind eus scho fascht z fescht gwürtzt gsi, er häts aber verschlunge, eis nachem andere. Medi Zit isch dä au no gad gsi.

Im moment tauter amigs erscht gäg de Abig uf, am morge mager irgendwie amigs nonig eso richtig und isch au sehr ahänglich und empfindlich. Im Aschluss as Zmorge hät de Liam dä no sis Wiehnachtsgschänkli vo Grosi und Grosspapi becho, es Kindle Fire for Kids. Ich find ja er brucht keis eignigs Tablet mit 2.5 aber villicht bin ich da no chli altmodisch. 😛 De Liam hät dä vo witem en Hundewelpe entdeckt und de natürli agstarrt. D Bsitzer händ das gmerkt und sind netterwies gad cho und händ de Liam de Hund streichle lah, mir händ natürlich nachher sini Händ desinfiziert. Kei Minute spöter hämer gad nomal en Golden Retriever Welpe gseh, Tiffany hät dä gmeint, dass die da sicher irgendwo verschänkt werded. 😉

Will de Liam immerno non-stop nach Pancakes gschroue hät, simer dä im QFC go e Fertigpancakemischig chaufe, eifach Wasser dezue, 30 Sekunde schüttle und id Pfanne gä, fertig. Bevors hei isch, simer no is Piatti eis go trinke, d Lust döt z¨ässe isch eus nachem letschte Mal vergange, isch alles so fettig gsi und überall, würkli überall häts Chnobli dra gha. Will de Liam pfused hät, sind Tiffany und ich mitem Chline heiglofe, d Uschi und de Reto sind mitem Auto Hei. Mir sind praktisch glich schnäll gsi. Ich bin dä no churz is Gym, wiedermal fascht leer gsi. S Guete isch, willi mitem Velo hi und retour fahre, hani s Iwärme und s Uslaufe au scho erledigt.

Woni wieder Dihei gsi bin, hämer am Liam zerscht mal Pancakes gmacht und für das, dass die quasi us de Büx sind, sinds super fein gsi, sogar Tiffany häts gern gha. De Liam hätmer natürli fliessig ghulfe.

Am Abig hämer dä no de Matt und d Katie erwartet, Tiffany hät sich sogar überwunde mal uf Englisch z Telefoniere und bim Yummy Cafe s Ässe bstellt, de Matt und Katie sinds dä ufem Wäg zu eus go abhole.

Platz am Tisch häts halt nöd für meh als 5 Lüt, bzw. mir händ nöd meh Stüehl. Aber mir sind ja unkompliziert. Es isch au das mal wieder sehr fein gsi. De Matt und Katie händ au no Wi mitbracht, da i de USA ischs normal, dass mer de dä gad ufmacht und trinkt, i de Schwiiz ja irgendwie undenkbar.

Eigentli isch dä adänkt gsi, dass Tiffany und ich mitem Matt und de Katie no eis go zieh gönd und de Liam bi Grosi und Grosspapi blibt. Wie scho erwähnt isch de Liam im Moment aber sehr ahänglich. Wo d Tiffany sich dä hät welle go parat mache, isch de Liam gad hinterher ghöseled und hät Tiffany umchlamered, so dass sie kei Chance gha hät sich umzzieh. Dä hämer müesse säge, dass bringt ja au nüt und mir blibed Dihei. I de Vergangeheit, isch das amigs es Zeiche gsi, dass de Chräbs wieder stärcher worde isch aber mal luege. Mir sind uf jede Fall froh, dass er bald d Infusion überchunt.

D’Uschi hät dä gfunde, dass mir Männer ja chönged gah und für Tiffany isch das au ok gsi, ich blibe und Tiffany gah, hetti de Liam nöd aktzeptiert. Defür hät de Liam no chli Zit gha sis neue Kindle chli uszteste und hät sichtlich freud dra gha.

Aso sind de Reto und ich mit de Katie und em Matt losgange, kei 10 Minute vo Dihei simer dä is Tornado, e Bar mit dutzende lokale Bier. Döt hämer dä d Sonny und de Michael troffe, d Sonny schafft im Cancer Care Alliance Center in Downtown, döt werded am Liam sini Zälle gad testet und züchtet. D Katie kännt die zwei vom Fuessball, sie spieled zäme inere Plauschliga. Mir händ dä länger über Fuessball gredt und dä isch usecho, dass es da extrem tür isch, sini Chind is Fuessball z schicke. Sie zahled irgend 1500 $ im Jahr pro Chind, dass sie chönd ime Club spiele, exklusiv Teamtrikot für d Match und alles andere. Für gueti Clubs zahltmer bis zu 5000 $ pro Jahr! Das isch da es riese Business schinds, ächt krass. Womer ine verzellt händ, wies bi eus isch, händs gfunde, ja das machi viel meh Sinn. Aber da merkt mer, dass da de Sport en andere Stellewert hät bzw. sehr uf Erfolg und Sieg us isch.

Nacheme Bierli, simer dä aber au scho wieder Hei, ich ha ja schliesslich no de Blog welle schriebe. 😉 Uf de Heifahrt, hät de Matt verzellt, das uf sinere Wiehnachtsfiir  gester d Lorde ufträtte seg, er schafft bi Amazon. Au nöd schlächt.

Jetzt gits no Medis für de LIam und morn gahts wieder in Spital für Labs.

Guet Nacht…

 

Riding with Mickey M…

Hüt hämer früeh use müsse, näb de Spitalbsüech, bringt so en Ufenthalt au diversi administrativi Ufgabe mit sich und wämer mit de Schwiiz zu de Bürozute wott kommuniziere, muemer entweder spat is Bett oder ebe früh us de Fädere. Zur entspannig isch Tiff hüt mal es Velotürli go mache, fräch wie sie isch, hät sie eifach mis Velo gstipitzt, will ihres chli stränger isch zum fahre. Isch halt wämers Velo nach de Farb ussuecht. ;)Wämer de Liam frögt, was s Mami dä amigs macht, wänn sie go jogge oder velofahre gaht, seiter immer: “ufs Bänkli hocke und Natel”. Wiener da druf chunt, hani nanig usegfunde.

Ich bin dä is Gym uf die 10i und de Rest isch uf die 11i is Spital für de Pflasterwechsel, Terminplan für die nächste Wuche und Medis abhole. D Sophie hät de Pflasterwächsel schinds wieder speditiv durezoge und am Schluss häts wieder es Autöli gä.

De Liam hät, wies jetzt usgseht, erscht abem Mittwuch Chemo. Mir händ eus dä im Starbucks bim River Entrance troffe. Dä händsmer gad verzellt, dass sie fascht no e Parkplatzrauferei azättled händ, ok das isch villicht chli übetribe aber sie händ um de Parkplatz müesse kämpfe.

Nachher ischs dä diräkt uf Tulalip id Seattle Premium Outlet Mall gange. Zwei häts dä bereits scho uf de Hifahrt gno.

Bevors aber as Shoppe gange isch, hämer no e chlini Stärchig brucht, zuefällig hät’s döt au es Rams Brewery Restaurant gha, womer vom U-Village känned. De Liam hät dä döt no paar Flirttipps vom Grosspapi becho.

Es isch dä gad e chli chalt und nass gsi, womer wieder is Freie sind. Am Liam hät s nasse Wätter irgendwie spass gmacht. Das hät aber de Vorteil gha, das mer fascht die einzige gsi sind. Es hät jedi erdänklichi Marke döt und überall häts 30-60% Rabatt gä, ufs gsamte Sortiment.

So häts de Liam natürli au packt und er isch richtig in Shoppinglune cho. Polo hätsem bsunders atah. Er hät sich dä immer vor de Spiegel gstellt und gluegt obs passt.  S Grosi hätem mit de Täsche gad no churz de Hacke gstellt. Klars foul gsi. 😉

De Liam hät rächt zuegschlage, de erst Lade hät ihn scho so gschluched, dass er nachher in Buggy hät welle.

Aber au nur biser dä die coole Autölis gseh hät, bis uf eis häter all usprobiert, s letschte isch ebe scho dur s Mami bsetzt gsi. Aber de Liam hät e riese freud gha und hät sis Usfährtli richtig gnosse. Er wär am liebste de ganz Tag döt blibe, irgendwänn isch eus dä aber s Münz usgange.

Nach de erfolgriche Schnäpplijagd simer dä no i eis vo de Tiffany ihrne lieblings Restaurant, Olive Garden, döt sind sie und ich scho vor 13 Jahr in Los Angeles amigs zäme go ässe.

Uf de Heifahrt händ dä wieder die gliche zwei pfused, nacheme churze halt im Met Market, zum no en feine Beerichueche go chaufe, simer dä wieder Dihei gsi. S Grosi hät dä no z tue gha und überall Zädeli vo de Chleider abgschnitte. S Mami hät am Liam i dere Zit de Hickman gspüehlt, dass de au ja nöd verstopft.

Ja und dä sind au all scho wieder müed gsi und langsam is Bett gange.

Guet Nacht…

 

Action🎬…

Hüt lohnt sichs wohl wieder en Kaffi usezlah, es isch e längeri Gschicht. Mir händ de Tag nöd mit Kaffi, sondern mit Facetime agfange, Grosi und Grosspapi wo i de Schwiiz sind, wänd natürli au wüsse wies am Liam gaht.

De Zmorgetisch isch hüt wieder voll bsetzt gsi, richtig gmüetlich. Mir händ müesse Energie tanke für de strängi Tag, wo vor eus gläge isch. Will hüt en bsundrige Tag gsi isch, hät de Liam döfe ussueche was er wott alege. Es isch dä kei überraschig gsi, daser de Mickey Mouse gwählt hät.

Am 10.30 Uhr isch dä euse Bsuech cho, d Jacqueline vom SRF. Sie isch eus go Bsueche zum sin Verlauf witerzverfolge. Sie hät am Liam sogar öppis us ihrne Ferie mitbracht, es chlises Plüschtierli. Hät sie natürli scho gross punktet bim Liam. Mir sind dä zäme uf die 12.15 Uhr is Spital glofe, sie hät dä zerscht es Interview gmacht mit de Dr. Gardner und mir händ Labs gha. Mir sind aber zimli sicher gsi, dass er Bluetplättli brucht, will er hät bi de Mulwinkel und de Peg chli blüetet. Lang hämer nöd müesse warte.

Mir sind dä vo de Jacqueline, de Medieverantwortliche vom Spital, de Spitalinterne Kamerafrau und ihrere Assistentin abgholt worde, Kamera isch glücklicherwis nöd so gross gsi wie i de Schwiz und hät am Liam kei angst gmacht. Ihn hät d Kamera gar nöd gross interessiert und er isch sowieso de ganz Tag rächt müed gsi. Das isch uf e Art schad gsi, will so isch sis ufgstellte und guete Gmüet gar nöd so zur gältig cho.

Es isch sehr spannend gsi, chli hinter d Kulisse zgseh vo some Dreh. Im Ruum 1 hämer dä uf Dr. Gardner gwartet. I de zwüschezit, hät eus Jacqueline interviewed. Mir de Dr.  Gardner hämer dä d Bluetwert besproche, wie erwartet sind d’ Bluetplättli under 10 gsi  und er hät e Transfusion brucht. Sini T-Zälle sind igfrohre worde und werded jetzt no testet, s neue Datum für d Infusion isch de 31.01., am Grosi sim Geburtstag. D Chemo isch ab nächstem Mäntig für 4 Täg planed. Sie händ eus dä laufend chli gfilmed während em Gspröch aber das hätmer gar nüm gmärkt oder mitbecho. D Jacqueline isch immer sehr besorgt gsi, dass es für de Liam und eus stimmt und dass es für de Liam kein Stress isch. Willmer dä eh no uf d Bluetplättli händ müesse, hämer dä no welle en Setwächsel mache und im Starbucks go filme, das wär aber so kompliziert gsi mit de Bewiligung, dassmer dä im Wartebereich witer gfilmed händ, d Kamerafrau hät au volle Isatz zeigt.

De Francesco, de Arzt us Lausanne, isch dä au dezue gstosse und hät au no es Interview gäh. Mir händ eus dä au no länger mit ihm unterhalte, öpper sehr sympatischs und au er hät eus sini Unterstützig zuegsichered. Er hät de initiali Kontakt hergestellt da in Seattle und kännt d Ärzt im Kispi guet. Er isch no 6 Mönet da und verfolgt die ganz Studie, s Ziel isch, dass er die Therapie chan i de Schwiiz durefüehre, hoffentli bald. Währends no am filme gsi sind, hämer dä plötzlich über de Lutsprächer ghört, “may the parents of Liam Wermelinger please return to the Oncology Clinic”, Wermelinger sogar no suber usgsproche. De Francesco hät eus dä zrug uf d Mountain Clinic begleitet.

Döt hät dä scho d Casey uf eus gwartet und s Benadryl isch au scho ready gsi. Irgendwie hät das bim Liam nüm die glich würkig, er isch nämli wieder nöd igschlafe, obwohl er erscht es Powernap ufem Wäg vo Dihei is Spital gmacht hät. Bluetplättli lönds zerscht immer langsam laufe, zum luege ober druf reagiert und nachere viertel Stund tüends dä ufestelle. D Stacey häts glaub gmüetlich gfunde bi eus, sie isch dä aneghöckled und hät chli mit eus gschwätzt, bis d Dr. Gardner nomal go ineluege cho isch, susch wär sie glaub gad blibe. 🙂 D Jacqueline isch sich dä au no go verabschide cho, in Begleitig vo de Kamerafrau und Assistentin, sie händ sie nöd ällei döfe im Spital umelaufe la. Mir händ sie dä no zum Znacht bi eus iglade, sie isch aber scho fängs mal gange und s U-Village no go erkunde. D Bluetplättli sind dä schnäll dine gsi und mir händ eus uf richtig Usgang gmacht. Dusse häts gstürmt und grägnet, mir sind dä i de komfortable Lag gsi, am Grosspapi chöne azlüte, dass er eus mitem Auto abholt. De Liam hät dä au Hei welle, es isch luschtig, i dere Zit womer allei da gsi sind, hät de Liam keis einzigs mal gseit er welli Hei, während mir im Spital gsi sind. Jetzt womer wieder Grosseltere uf Bsuech händ, wotter möglichst schnäll Hei zu sine Schöfli.

Nachdem mir halbe de Doktor gmacht händ, bismer de Chindersitz installiert händ, hämer dä chöne losfahre. Tiffany isch so ines Züg inecho, dass Kamera gad angst übercho hät und kei scharfi Bilder meh gmacht hät.

Installiere sälber isch länger gange als d Fahrt aber defür simer troche acho. S Grosi und de Grosspapi sind i eusere Abweseheit netterwis no go poschte gange. Zum Znacht häts dä aber glich Hamburger vo Eastlake Bar & Grill gä, die sind eifach guet. D Jacqueline isch dä au wieder zu eus gstosse und mir händ gmüetlich zäme gässe. Sie hät dä am Liam no es Sneak Preview vo de Ufnahme gäh und  isch dä richtig Flughafe ufbroche.

Es isch en ufregende und spannende Tag gsi und es isch alles sehr entspannt abglofe. Wieivel dä schlussendlich würklich i de Doku chunt, werdemer dä gseh. Mir hoffed aber, dass eusi Beteiligung a dem Projekt hilft, die Therapie i de Schwiiz bekannt zmache und dass es de Druck erhöht, die Therapie i de Schwiiz z ermögliche.

De Liam hät dä no chli mitem Grosi gmaled, händ aso beid rächt Talent. Wo s Grosi dä churz weg gsi isch, hät de Liam finsüberlich alles wieder ufgrumet und a sin Platz versorget.

Er hät dä aber d Putzequipe nomal uf de Plan grüeft, woner de Bächer mit Milch usversehe umgrüehrt hät. Gross interessiert, häts ihn aber nöd.

Morn sött dä de Spitalufenthalt churz und heftig si, er muess sis Pflaster wieder wächsle lah.

Danke no vielmal für die viele liebe Kommentär!

Guet Nacht…

Full house…

Tiffany isch hüt wieder chli früehner ufgstande, zum ihrem neue Hobby nagah. Sie isch fängs so schnäll, dass nöd mal d’Kamera sie richtig verwütscht. Mer cha sie bald “The Flash” nänne.

A eusem freie Tag, händ de Liam und ich usgschlafe. Wo s Mami dä wieder zrug gsi isch, hämer zäme zmörgeled. En feine Kaffi fehlt halt amigs no, defür gits aber feins Sourdough Brot früsch usem Ofe. De Liam luegt dä immer am Mami ab was sie isst und wott dä s gliche, nur mitem Unterschied dasers dä nach zwei Biss nüme wott.

Will mir ja hüt nöd is Spital händ müesse, hämer de Hickman sälber müesse spüehle, de Liam macht sich dä en spass drus und gaht sich go verstecke vorem Mami.

De Liam hät mängisch scho chli en Knall, während ich da gad am schriebe bin, hätter jetzt eifach afange Happy Birthday singe für mich und Tiffany.  😀 Au susch wird er immer meh es Persönli. Wonem Tiff hüt mal öppis weg gno hät, hätter gad trötzled. Näb ihm isch es Glas Smoothie gstande, unter anderem mit Rande und Erdbeeri, dä hät er gseit, “usleere” und ohni das mir händ chöne reagiere, isch de Bode nass gsi. Haha Mir händ beid nöd rächt chöne glaube, dass er das gad gmacht hät. Mir händs dä zäme putzt und ihm probiert z erchläre, dass die Aktion nöd all zu cool gsi isch. 😛 Tiffany und er händ sich aber hüt eh chli gägesitig ufzoge.

Bescht Zitpunkt für mich zum is Training gah, kei 5 Minute hani mitem Velo döt ane, a das chöntmer sich gwöhne. Diräkt nacher bini no zum Coiffeur, de Cody hät glücklicherwis gad Zit gha. Er hät nomal betont, dass er eus gern mal wür Seattle zeige.

Woni Hei cho bi, isch dä euse Bsuech scho da gsi. 🙂

Grosi und Grosspapi sind acho. Wills dä doch au chli müed gsi sind vom Reise, simer dä chli veruse a die früschi Luft. Leider häts rächt grägned aber für das gits ja Schirm und en Rägeschutz für de Buggy, au wänns öpper nöd so gutiert hät, womer de installiert händ, d’Alternative wär nass werde gsi, drum isch dä ok gsi. Und er hät sowieso nach 5 Minute marschiere gschlafe. En feine Kaffi häts dä au no gäh im U-Village. Tiffany hät dä ihrne Eltere ihre persönlich Lieblingslade zeigt, viellicht gits ja öppis vom Mami und Papi, bi mir hät sie bis jetzt kei Erfolg gha.

Go ässe simer natürli i eusi Stammbeiz s’Joey. De Liam hät das aber verpasst.

Ich han kei Ahnig was Tiffany da dänkt hät aber villicht händ ihr e Ahnig, chönd gern eui Idee i de Kommentär ineschribe. 😉 Ich hans aber eifach e cools Foti gfunde.

Nachher simer dä no go Windle poste, Amerika muemer eifach liebe, scho nur die Uswahl a Windle.

Es isch schön das wieder chli Familie da isch, mir werdets gnüsse und händ wieder es volls Huus.

Morn wird wieder en ufregende Tag, es chunt eus wieder öpper go bsueche und mir händ en Termin bi de Dr. Gardner, womer dä es gnauers Bild vo de nächste Täg und Wuche sötted übercho.

Guet Nacht…

Easy Rider…

Hüt hämer Labs gha am 10.10 Uhr. Will gester en Firtig gsi isch, häts hüt extrem viel Lüt gha, mir sind aber trotzdem zackig dra cho. De Aaron hät hüt Bluet gno, flotte Typ und er isch richtig gspröchig gsi, er seg am Wuchenend in Leavenworth gsi, es Städtli wo ame Alpedörfli naempfunde isch, so wies tönt hät, händs all Klisches i ein Ort packt.

Wills hüt so viel lüt gha hät, hät er dä gmeint es chöngi chli länger gah bismer d Wert händ. Mir sölled ruhig id Kantine abe gah, de Liam hät gester de ganz Tag nur vo Pancakes gredt und isch voller vorfreud gsi, leider simer 5 Minute z spat gsi und sie händ s Zmorgebuffet scho abgrumet. Dä häts halt English Muffins und Milchli gä.

De Liam hät dä sis eigene Brötli welle striche und er häts sogar gässe, lust hätter aber glich meh uf öppis anders gha, Pancakes. Ah ja, es “Hallo!” gits au no für alli.

Womer fertig zmörgeled händ, simer dä wieder in 8. Stock ufe, döt hät de Liam sis Idol troffe und isch ganz ufgregt gsi, woner es Foti hät dörfe mitem mache. Womer de vor 3 Wuche s erst mal gseh händ, ischer no ganz skeptisch gsi. Aber er weiss ja jetzt, er isch en liebe, wie au de Samichlaus au.

Mir händ eus dä wieder am Empfang i de Mountain Clinic gmulde und nachere churze Wartezit, hät eus dä d Triage Nurse d’Wert überbracht und mit eus besproche. D’ Bluetplättli sind bi 19 gsi also kei Transfusion hüt. Mir sind dä wieder losgwatschled, use zum schöne Wätter.

Wie immer, simer au hüt wieder am St. Helen’s Cafe verbi glofe wo diräkt am Trail lit, hüt häts eus irgendwie inezoge und die schön Terrasse hät sich abote zum dusse höckle.

D’Tiffany hät en Rucola Salat gno und ich grösteti Röslichöhl. Tiffany hät glaub en ganze Sack Salat übercho, mis hät zwar nöd so amächelig tönt aber es isch usgezeichnet gsi. De Liam hät aber vo dem nüt meh mitbecho, er hät scho pfused.

Er hät dä au no es wili witer pfused, womer dihei gsi sind, er häts wohl brucht. Am Namittag hämer eus dä für eusi ersti Velotour parat gmacht. De Liam hät zerscht nöd so rächt welle inehocke in Anhänger aber de Helm döfe azlege isch e gnueg guets Argument defür gsi. Willmer nöd rächt gwüsst händ, wie ihm s Fahre gfallt, simer nur churz zum Met Market düsed. Er häts aber sichtlich gnosse und hät gar nüm welle usstige.

Simer halt samt Ahänger in Lade go poschte. 🙂

Bevormer wieder losgfahre sind, ischer schier vergizled und hät immer gheped: “Velo fahre, Velo fahre!”. Das isch aso scho no e cooli und praktischi Sach, d Täsche hämer au gad hine in Ahänger chöne versorge.

Dihei wieder acho, häts Znacht gäh und nacher häts no chli z tue gäh, mir händ d Wohnig no chli müesse uf vorderma bringe, mir chömed ja morn höche Bsuech über. :D’Uflösig wer, gits morn. 😉

Guet Nacht…

 

 

Pump it up…

Willmer gwüsst händ, dass mer hüt wieder länger im Spital werded si, sind de Liam und ich allei ufbroche und Tiffany isch go ränne. Wie immer hämer diräkt vorem Spital wieder es Zitli bim Fuessgängerstreife müesse warte.

Mir sind dä gmüetlich min Kaffi, Zmorge und am Liam sis Armbändeli go hole. De Liam hät fliessig Panakes gässe aber ohni Syrup, nöd sis, das hätter dütlich gseit.

Hüt isch d Stacey zueständig gsi für eus und s Bluet isch scho nach wenige Minute am laufe gsi, s Benadryl hätter vorher aber no übercho.

Es hät zwar wieder schnäll gwürkt aber de Liam hät nonig richtig gschlafe wo i de Bucht näbedra öpper neus cho isch und de Fernseh so lut igstellt hät, dass de Liam wieder ufgwacht isch. Aber er hät dänn halt chli sini neu Lektüre gläse.

S Mami isch dä au bald go inegüggsle.

S Bluet isch 3 1/2 Stund lang glofe. Ich bin dä chli früehner los gange, zum no is Training z gah. De Liam isch bim Heilaufe dä wieder igschlafe und wills so schön und warm gsi isch, sind die zwei dä no dusse ghöckled, wo ich Hei cho bin. Chum isch da bizli wärmer und d Sunne schint, händ d Lüt da glaub s Gfühl es isch Hochsummer und laufed i churze Hose und T-Shirt ume. 🙂

Hüt isch dä au de Tiffany ihres Velo äntli cho und somit hämer euse Fuhrpark komplettiert. Jetzt hämer nur no müesse de Ahänger und de Tiffany ihres Velo zämebastle. De Liam isch da wieder mit vollem Tatedrang und Isatz debi gsi. Bi dem Wätter hämer das uf eusere Terrasse gmacht, dä hämer sie au mal brucht, viel Glägeheit dezue hämer nonig gha. S Werchzüg isch leider au nöd immer ganz s richtige gsi aber de Liam hät ghulfe woner hät chöne.

Nacheme Zitli hämers dä au gschafft nur d Pneu sind nonig ufpumped gsi. Mir händ ja no kei neui Pumpi gha.

Mir händ aber eh welle uf es früehs Znacht is U-Village abe und ufem Wäg lit no en Velolade, keis Wunder bi all dene Velofahrer. Die Händ eus dä mitere richtige Pumpi, Liecht und Velogloggene usgrüstet.

Go ässe simer dä is Joey, simer scho länger nüme gsi. Eusi Serviertochter isch isch sehr zuvorkommend gsi, ich weiss sie läbed vom Trinkgäld aber sie hät glueged das würkli alles stimmt für eus. S beste isch aber wieder de Öpfelchueche gsi, de isch eifach himmlisch. De Liam hät sich au wohlgfühlt und isch richtig kuschelig druf gsi..

Medizin und Sondenahrig bruchter halt amigs au unterwägs, drum hämer immer e halbi Apothek debi.

 

Zum verdaue simer no chli umegschländered und schlussändlich im American Eagle glandet, de Liam isch super druf gsi und vorallem fräch. Er isch immer wieder abghöseled und debi hätsen amigs fascht verbutzt. Schlussändlich ischer i de Lingerie Abteilig glandet und hät döt BHs studiert.

Dihei hämer dä no d Velos und de Ahänger ufpumped und alles montiert. Jetzt simer also voll parat zum de Trail deruf und derab z fahre. Ufe und abe gahts da relativ viel, es seg nach San Francisco die zweit hügeligsti Stadt. Downtown hätmer amigs würkli s Gfühl mer seg in San Francisco, bi dene steile Strassene.

Will hüt Martin Luther King Day isch, händ die vo de Planig nöd gschaffed und sie händ eus somit für morn kein Termin chöne gäh, ez müemer morn alüte und werded dä ufbote. Drum heissts jetzt go schlafe gah und morn am Morge alüte.

Guet Nacht…

 

 

Birdy…

Hüt sind alles Pflegerine uf de Clinic gsi womer nonig kännt händ, nöd dänkt, dass das no mögilch isch. Sie händ dä gad Bluet abgno und is Labor gschickt. Sie händ au gad no d Caps bim Hickman gwächsled, die muemer da eimal i de Wuche wächsle, das sind so spezielli Verschlüss.

Nachere Stund hämer dä d Wert becho, Bluetplättli under 5 und die rote Bluetkörperli au tüf. Da nämeds s Hematocrit als Mässgrössi und de Grenzwert bi ihm isch 21 und es isch bi 22 gsi. De Liam hät au wieder Petechie, drum hämer vermuetet dases wieder Nachschub brucht. Für das isch er aber immerno rächt fit. Mir händs dä ufteilt uf hüt Bluetplättli und morn rote Bluetkörperli. So ischs nöd so viel vom Volume her und mir händ no chli use chöne, bi dem schöne Wätter. S Benadryl hät dä wieder schnäll gwürkt.

Die eint Familie vo Dütschland hämer dä au wieder gseh, sie sind au für en Check im Spital gsi. De Zuefall wotts dasmer die zwei Familie jetzt immer meh gsehnd, guet im Spital bütet sich das a aber gester uf de Ferry, wo 150 Autos druf Platz händ, hät die ander Familie diräkt näbed eus s Auto abgstellt. Ich ha bim usstiege dänkt, de Ma chuntmer bekannt vor aber ha dä gfunde, nei das cha nöd si. Bim wieder istige is Auto hani dä aber gseh, dass de Sohn kei Haar und e Magesonde hät, sind also tatsächlich sie gsi.

Bevormer dä wieder gange sind im Spital, häts dä no es Milchli gäh für de Liam. Er isch voll uf de Gschmack cho, nüme nur Milchschum.

Nachem Mittag simer dä chli use, es isch no schöner Wätter gsi als gester und de Liam isch i Marschlune gsi. Er hät au sini cooli Lüchtschueh agha. Die gseht mer dä spöter no. I Fotilune ischer au gsi. Bi mit zwei rächte Styler unterwegs gsi 🙂

De Liam hät allerlei gseh ufem Wäg, Chind am spiele, Hünd, Eichhörnli, Velos, natürli viel Autos und Vögeli.

Irgendwänn simer dä bi de Union Bay Natural Area acho, tönt vielverspräched aber isch eigentli eifach es Moorgebiet aber trotzdem sehr schön. Und e herrlichi Sicht uf de Lake Washington und de Mount Rainier, ja de hätmer au wieder gseh, obwohl das ja extrem sälte de Fall söll si, hätmer eus gseit. 😉 Mir händ dä beid müesse säge, wänns nöd rägnet ischs no richtig schön da.

Am Wasser entlang ischs dä zum Uni Stadion gange wo au gad diräkt am See lit, leider isch ja d Uni Football Saison scho ume, das wär sicher au no es Erläbnis gsi, s’Stadion fasst 70’000 Lüt und das isch fascht no wenig für e grossi Uni.

Rund ums Stadium häts no alli Arte vo Sportalage, e grossi Halle für Basketball, Baseball-, Fuessballfelder, e Liechtathletik Alag, alles wos Herz begehrt.

Und natürli schöni Wäg zum laufe. Bi Birdwatchers schinds au no beliebt z si, vo dene hämer au no paar gseh i Vollmontur mit Teleskop und Feldstächer, eine muessne gad dur d Lappe si, so wies tönt hät.

Mir händ dä mal Lust uf en Kaffi becho und sind richtig U-Village gschländered, döt häts natürli au drü Starbucks, eine devo gseht chli us wie en Flagship Store. De Kaffi isch aber gnau de glich. Was gha hät, sind extrem viel Studänte, euse Kaffi hämer dusse a de Sunne gnosse. Isch au für de Liam spannender gsi, so häter luter interessanti Beobachtige chöne mache. Jedes Mal wänner en Hund gseht, chöntmer meine er gseht eine zum erste Mal.

Nachdem mir no en Frosch gstreichled händ, simer dä au wieder Heizue gange, miteme abstächer in QFC, euse anderi Lebensmittel Shop. Döt händs e riese Uswahl a lokalem Bier und mer cha sich es Sixpack für $9 zämestelle, nach Wunsch. Das hämer dä au mit aller Sorgfalt gmacht, nur leider hät Kassiererin öppis degäge gha. Ich han wie immer mini ID vorgwisse und das isch bis jetzt au no nie es Problem gsi, weder ime Restaurant no im QFC. Aber sie hät dä druf bestande en Pass z gseh, de hani natürli nöd debi gha, dä häts halt kei Bier geh. Tiffany und ich gsehnd halt beid no so jung us. 🙂

De Liam hät dä nomal Lust gha zum chli laufe, er lauft dä aber au döt dure woner gad wott und achtet nöd gross uf anderi, mer döfen aber uf kein Fall hebe, susch fangter gad a mötzle, mer söllen ja loslah. Irgendwie ischem dä de Nuggi usegheit aber en fründliche Passant isch dä gad zur Stell gsi. Ah ja, da gseht mer au sini coole Lüchtschue in aktion.

En gmüetliche Tag isch dä langsam z Änd gange und de Liam hät am Mami no d Chappe klaut.

Bim ischlafe häter dä plötzlich gfrögt wo s Urgrosi und de Dädä (de Urgrosspapi) sind, die sind scho am schlöfele, das mached mir jetzt au.

Guet Nacht…

PS Ich bi laufed d Site am verbessere, ich has jetzt äntli gschafft, dass mer sich cha ischriebe, wämer jewils e Benachrichtigung wott, sobald ich de neusti Post ufeglade han. Das isch zunderst une ide Fuesszile, “SUBSCRIBE TO BLOG VIA EMAIL” heissts döt und mer cha eifach sini E-Mail Adresse igeh, mer chunt dä no es Bestätigungsmail über (Spam Ordner checke) womer dä nomal muess bestätige, dassmer de Blog wott abonniere. Falls was nöd sött klappe, bitte mälde.