Let’s play some music…

Sie händ am Liam am morge am 5i de Verband gwächsled, willer so nass gsi isch, das hät ihn aber offesichtlich gstresst, dass er nachher nüm so rächt hät chöne schlafe. Da er kein Schluch meh im Mul hät, hät er dä au wieder am Mami chöne rüefe.

Am 8i natürli wieder Visite, obwohl mir amigs erscht churz vorher ufstönd, händs hüt gmeint, mir gseched immer so fit us wänn mir da stöched. Die ein Ärtzin hät dä gseit, sie hegi ghört, das de Fedi euse Nachbar gsi seg, sie muess no de grösser Fan sie als de Tom, wonere s Foti mit ihm zeigt han, isch sie schier usgflippt. 🙂 Für einmal en lustige Start in Tag gsi. De HigFlow händs welle vo 10 Liter uf 8 Liter abeschrube, d Nahrig wieder uf 25ml/h und ihn beobachte wie er mit weniger unterstützig z rächt chunt. Ganz ohni Check gahts dä glich nöd, es Ultraschall vo de Blase händs no agordnet.

D Corinne und s Grosi sind hüt morge ja wieder abgreist, mir hoffed sie reised guet und weniger umständlich als bim Hiflug. 😀

Mir händ hüt d Emily als Nurse gha, es Energiebündel und das scho am Morge früeh. 🙂 Sie isch es wandelnds Lexikon, sie hät unter anderem au die ersti Car-T Patientin betreut wos da in Seattle gä hät, das seg vor nöd ganz 5 Jahr gsi, sit dänn heg sich extrem viel ta. Damals hegeds no kei Ahnig vo de Näbewürkige gha, die hegeds mittlerwile rächt guet im Griff.

Am Morge isch dä chli meh los gsi, am 9i de Ultraschall, am halbi 10i d’Wundexpertin, das mal isch nöd d Leslie cho, d Wunde am Hinterchopf gseht scho viel besser us.

Am 10i händs ihm die Arterielli Leitig zoge, die hät sin Bluetdruck gmässe und ihn rächt igschränkt, willer de Arm nöd hät chöne büge. Das hät dä aber chli Vorbereitig brucht und d Emily hät gad no e neui Nurse igfüehrt.

Drum isch gad guet gsi, das am halbi 11i d Evelyn cho isch, chli go Musig mache. Am Afang spielt sie immer s Lied, “Let’s play some music”. Sie händ glaub würkli gmerkt, wie guet am Liam d Musig tuet und ihn das vorallem beruhigt, wänns a ihm umegfäterled. Eigentli chömeds nöd so oft verbi aber bim Liam macheds e Usnahm. De Grosspapi und Grosi händ au ganz gspannt zueglost, de Papi natürli au.

De HighFlow händs um die halbi 9i abegstellt, am Mittag isch dä de Tom go luege, wie de Liam schnuft und ob ers vertreit. De Liam hät sich guet ghebed vo de Wert her, villicht e biz agsträngter gschnuffed aber das isch au ok, er muess sich zerscht wieder dra gwöhne, sie händ dä aber gseit, dass hüt wohl nüm witer abegönd mit em Druck, sie wänd ihm gnueg Zit gä.

Ziel vom Tag isch au gsi, de Liam so guets gaht z mobilisiere, er hät dä am Namittag also döfe zum Mami uf de Stuehl sitze, er häts dä rächt lang usghalte, das hät dä au wieder ghulfe bim ablah vo Flüssigkeit bi sine Drainage. Abem Mäntig, sött dä au d Physio wieder cho, wos hüt cho sind, ischer tüf und fescht am pfuse gsi.

So ganz fit isch de Liam hüt doch nonig gsi, mir händen wiedermal probiert mit Baseball chli uf zstelle, mir händ dä plötzlich au es paar Zueschauer dusse gha, es händ sich e paar Nurses vorem Fänster versammled und gigeled. De Liam hät sich dä immerhin mal zume “mattu” hirisse la, das heisst “machscht du”, ich bi de Ball underem Buggy am sueche gsi. 🙂 Mami isch aber immerno am höchste im Kurs. Hüt isch d Frag mal gfalle ob de Liam dä ehner en Mama’s Boy oder Papa’s Boy seg, ich glaub mis spontane Gröhle isch Antwort gnueg gsi. 😉

De Liam hät viel gschlafe, i allne erdänkliche Lage.

I dere Zit isch dä au d Cara eus nomal go bsueche cho, sie heg hüt morge gfröget, ob sie eus döfi ha aber es seg anschienend nöd gange aber es klappi sicher es anders mal. Sie isch wieder extra vom 5. Stock ufecho zum go Hoi säge.

D Dr. Tarlock vo de Onko isch dä natürli au wieder cho und hät gseit, mir lueged mal wies ihm morn gaht und allefalls chunter dä halt nomal Kortison über, falls er no chli meh Zit brucht wägem Schnufe. Ufem Ultraschall händs gseh, das er immerno öppis i sinere Blase hät, d Urologe müend jetzt luege, ob mer das no vor de Car-T Zälle muess gnauer aluege oder ob das au langed, wämer das nachher macht.

Will er jetzt wieder richtig ernährt wird dur d Sondenahrig, hät das d Verdauuig wieder chli in schwung bracht. Er hät sich mal richtig chöne erliechtere und de Buch isch dä au wieder viel weicher gsi nachher. Grosi und Grosspapi sind au am Namittag wieder da gsi. De Liam hät sogar möge fascht grad sitze im Bett. Au es Zeiche, dass de Buch besser isch.

De Emily ihri besti Kollegin isch d Kennon, sie hämer damals womer s erste Mal uf d ICU cho sind, churz e Stund als Nurse gha. D Emily hät hüt ja gmerkt wie gern de Liam Musig hät und weiss aber au, dass d Kennon cha Ukulele spiele, d Kennon hät dä gseit, sie bringi morn ihri Ukulele mit und spieli dä für de Liam. Guet, dass mir eusi eigni debi gha händ, so hät sie hüt scho e chlini Choschtprob chöne gä. Es hät ihre aber richtig spass gmacht, au will sie gseh hät wie de Liam das gnüsst, e gueti Stimm hät sie dezue ane au no gha. Sie nähmi morn no ihres Liederbuech mit, mitem Handy seg müehsam. Sie mached alles, damit sich de Liam wohlfühlt.

Ah ja hüt häts au wieder gschneit dusse, es hät irgendwie scho lang nüme grägnet da, richtig ungwohnt, nöd dass jetzt e riese Rolle wür spiele, willmer ja eh da ine höckled. 🙂

Am Abig hät dä de Mitchell für d Emily überno, er isch us Kentucky, dass känned die meischte wohl vo KFC oder em Kentucky Derby. En richtige Südstaatler, au ganz en flotte.

Mir wünsched allne en guete Start is Wuchenend.

Guet Nacht…