Liam Tyler – May 11, 2015

De Liam hät i sim Läbe scho viel erläbt. Bis er 18 Mönet alt gsi isch, häter e stink normals Chinderläbe gfüehrt, isch bis döt ane scho zweimal in Amerika gsi und hät die schöne Stränd vo Mallorca döfe entdecke. Wo mir im November 2016 i de USA i de Ferie gsi sind, hämer ändi Ferie gmerkt, dass mit ihm öppis nüme stimmt, er isch nur no ume ghocket und hät sich weder möge ufezieh, no chrüche und er hät immer wieder Fieber gha. I de Schwiiz acho simer no am gliche Abig in Notfall im Kispi. Döt händs eus dä sehr schnäll gseit, das er Leukämie hät. Er isch ime ganz schlächte zuestand gsi. Er händ en sehr starche Infekt gha und ganz bleich vo de tüfe Bluetwert. Er isch mitere High Risk Akute lymphatische Leukämie diagnostiziert worde. Mir sind dä 5 Mönet lang stationär gsi im Kispi. Die erste Mönet hät er unedure müesse mit zwei Darmbluetige ischer uf de Intensiv Station glandet. Er hät sich dä aber wieder zrug kämpft und es ischem dä im Früehlig immer besser gange. Mir händ dä sogar längeri Abschnitt Hei chöne, mit tägliche ambulante Bsüech im Kispi. Für Ändi Mai isch dä e Chnochemark Transplantation vorgseh gsi, leider häter dä aber en Rückfall gha und er isch nüt parat gsi für Transplantation. Nachere Antikörper Therapie hätmeren dä ändi Juni so wit gha und am 20. Juli 2017 isch s Chnochemark transplantiert worde. Ändi August hämer dä Hei chöne und er isch wüchentlich kontrolliert worde bis Afangs November, woner dä nur no zweiwüchentlich kontrolliert worde isch. Am 21. Novmeber simer dä mit de Tatsach konfrontiert worde, dass bim Liam de Chräbs wieder zrug isch und scho wit fortgschritte. D’Ärzt händ dä aber schnäll e Lösig parat gha und es isch dä no chli es zittere gsi ob das dä au klappt. Nach witere 3 Wuche Chemo und heftige Näbewürkige simer dä am 19. Dezember zu eusem Abentür uf Seattle ufbroche.

Mami – Tiffany

Papi – Thomas

Mir probiered de Liam best möglich z unterstütze und für ihn da z si.