Don’t leave…

Hüt hämer erscht am 10.30 Uhr müesse im Spital si, au guet, hämer nomal chöne usschlafe, zumindest de Liam und ich, Tiff isch wieder go jogge. Tststs, macht fängs meh Sport als ich. 🙂 I de Mountain Clinic hät eus dä d Kristen für Labs abgholt. Sie reded da immer vo CBC wänns Bluet abnehmed, bismer mal usegfunde händ, dass das Complete Blood Count heisst, ich ha immer CDC verstande, das isch aber “Center for Disease Control and Prevention”, nöd das womer wänd. Nachher simer dä nomal is Wartezimmer bäte worde, bismer dä mit de Frau Dr Streineck Termin gha ha. Mir sind dä döt ghöckled und jedes mal wänn de Liam öpper kännt hät, häter de Name gseit und uf die Person zeigt, Kayla, Adam, wänner de Name nöd gwüsst hät, häter Frau/Ma gseit. Am 11:40 hämer dä in Room 5 chöne, zerscht aber no schnäll Gwicht und Grössi mässe. Das isch da so e Sach, es ischne mega wichtig z’wäge, daser sich aber halbe am Mami ufezoge hät während er uf de Waag gstande isch, isch egal. Es hät 11.8 azeigt und mir händ nachher zunenad gseit, das wird sicher es Thema si bim gspröch. So isches dä au gsi, er segi ehner wieder gsunke mitem Gwicht, wänn sie d Kurve aluegt, mir händ dä gseit, ja das seg wahrschinli wills nöd richtig wäged. Das isch dä ok gsi für sie und sie hät de Ernährigsberatig abgseit, die isch nämli schowieder ufbote worde. D Ärzt stuhned immer so da, wänn de Liam scho s Mul offe hät ,wänns wänd dri luege. Sini Wert sind abgseh vo de Bluetplättli guet gsi. D Leberwert sind au wieder gsunke, die sind letscht Mal chli z höch gsi. Sini Bluetplättli sind also schowieder uf 10 une gsi, heisst Transfusion. Sie hät dä gseit mir chönged uf die 3 wieder cho, sie heged gad kei Platz und Zit, mir sölled aber no schnäll warte, will es chömi na e Oberärztin vo de Plat Studie, wo de Liam no wott aluege. Wo sie gseit hät, “hang on just for a couple of minutes”, hämer gwüsst, das cha länger gah. Mir händ dä gwartet.

Nacheme Zitli hät Tiffany afange umewitzle, dasmer gönd und hät de Liam in Buggy ta, dass er cha schlafe. Sie hät dä immer wieder gseit, “let’s go” oder “I wanna go home”. Irgendwie müend die das ghört ha, oder die händ irgend d Gägesprächalag aktiviert gha, will es isch dä de Aaron inezstürme cho und hät gseit “don’t leave!”. Haha eus häts verbutzt vor lache. Mir händ gar kei Chance gha öppis z säge, ischer schowieder weg gsi. De Aaron isch Chief Nurse.

Paar Minute spöter isch d Julia, e anderi Nurse cho, zum säge mir chönged gad blibe, d Plättli seged ufem Wäg. Sie hät dä no bemerkt, das heti eus eigentli de Aaron scho sölle säge. D Julia isch die wo am Liam am Afang mal en Abstrich vo sinere Nase und sim Popi hät müesse mache, sie hät dä au gmeint, dass sie aso scho lieber Transfusione ahänki. De Liam isch ja nöd nachtragend.

Irgendwänn isch dä Oberärztin no cho sich go vorstelle, meh hät sie eigentli gar nöd welle, de Liam hät sie aber iischalt ignoriert und isch gad änglischi Chinderlieder am lerne gsi mitem Mickey Mouse.

Er hät dä irgendwänn mal Hunger übercho, logisch isch ja Mittag gsi mittlerwile. Ich bi dä go Pommes Frites hole mit Ketchup und er häts gnüsslich verdruckt. Während ich die go hole bi, häter schinds die ganz Zit Liedli gsunge, sogar wo d Julia inecho isch, sie isch schwer beeidruckt gsi, daser änglisch singt. 😉

Irgendwänn hämer dä mal de Bütel mit de Bluetplättli gnauer agluegt und gseh, dass döt A positiv gstande isch, de Liam isch aber 0 positiv. Willmer dä chli veschrocke sind, hämer de Julia glüte. Sie hät eus dä aber ufklärt, dass er Bluetplättli vo allne Bluetgruppene cha übercho, solangs positiv sind. Bi de rote Bluetkörperli gsehts anderscht us. Sie hät am PC dä gad no s Schema zeigt, womer gseht was er dörf übercho. Es seg guet dasmer fröged aber es werdi immer drüfach prüeft. Ganz e flotti, d Julia aber das simer ja vo de Lüt da gwöhnt. Sie hät au extra nagfröget obmers chli schnäller cha laufe la, dasmer schnäller wieder dusse sind. Chum simer parat gsi zum gah, isch de Liam igschlafe. Aber au guet, mir händ eh no churz welle go Läbensmittel poschte.

Wieder Dihei, häts de Liam wieder luschtig gha.

Zum Znacht häts für de Liam und Tiffany wieder Spätzli gäh, für mich Surf and Turf.

Mir händ eus no günstigi Velos bstellt, hüt ischs erste cho, naiv wie mir sind, hämer dänkt das chömi scho zämegsetzt, fascht. Drum wahrschinli au so günstig.

Jetzt müemer zerscht mal Wärchzüg ha. Und e Velopumpi. Hämer morn also öppis z tue.

Guet Nacht…

 

 

Day off…

Äntli mal wieder usschlafe, gmüetlich Dihei Zmorge ässe hät eus allne wiedermal guet ta. Tiffany isch dä aber vorem Zmorge glich no schnäll go jogge, sie nimmt das rächt ernst.

Mir händs dä gmüetlich gno und sind chli Dihei blibe zum relaxe oder wie de Liam seit, hänge.

Am Namittag simer dä, trotz Räge, no chli use und is U-Village glofe. Döt häts dä zerscht mal en Kaffi gäh, sit hüt gits bi Starbucks “blonde espresso” mir hät de super gschmöckt, de Tiffany dütlich weniger.

Wills ja so viel rägnet in Seattle, gits überall im U-Village so Töpf mit Schirm drin, döt chamer sich bediene und am Schluss wieder abgeh, praktisch.

Mir sind dä in Pottery Barn for Kids, en Chindermöbellade. Döt häts super cooli Kajhüttebetter gha, mir hetted am liebste es Star Wars Bett kauft aber ja das passt chum in Koffer.  De Liam hät dä aber öppis anders entdeckt.

Es hät dä aber es Wägeli gä, viel nützlicher.

Nachher simer dä no es Glace go ässe im Menchie’s Frozen Yogurt. Döt häts irgend 20 verschideni Sorte Frozen Yogurt und dä no diversi Toppings und Saucene. Mir sind aber bi Vanille und früsche Banane und Erdbeeri blibe. Das hät am Liam au super gschmöckt und er hät fliessig gässe.

Womer dä aber fertig gsi sind und händ welle gah, de Liam isch scho im Buggy gsässe, hät de Liam dä über Buchweh klagt. Ich ha dä sofort nachem Chotzbütel (sorry für de Usdruck) griffe aber er hät dä scho die erst Ladig uselah. De armi Cheib isch ganz volle gsi, Tiffany hät aber zum Glück immer Ersatzchleider debi. Dä hämeren gad im Lade umzoge und chli putzt. Es ischem dä au gad wieder wohler gsi.

Er hät dä am Abig au wieder öppis möge ässe, er fahrt gad voll uf so Mozzarella Sticks ab. Und guet druf ischer au wieder gsi.

Und dä isch de Tag au schowieder verbi gsi, mir händen sehr gnosse. Morn gahts dä wieder id Kontrolle.

Guet Nacht…

CT…

Hüt häts emal nöd grägnet. Es hät nomal Chemo und Ambisome gäh, hoffentli beides zum letschte mal für es Zitli. Das isch dä bis am halbi Elfi dine gsi. Churz bevor mir witer händ müesse, isch en Volunteer cho go Music mache, er isch schinds sogar uf Spotify, er hät au en Bezug zu de Schwiiz gha, sin Sohn seg gad i de Schwiiz. De Liam hät freud a de Gitarre und de Mundharmonika gha, wo de Musiker gange isch, hät de Liam gseit “meh Clown”. I de Schwiiz chömed Clowns halt amigs mit de Gitarre.

Nach dem churze Konzertli isch dä in 6. Stock id Radiology zum Amälde fürs CT gange. Mir händ dä döt wieder es Formular müesse usfülle mit paar Infos, zum Bispiel, dass de Liam en Hickman hät. De Liam hät dä d Schriebunterlag gad bhaltet zum chli male, hetmer eigentli nöd döfe aber sie händ dä es Aug zuedruckt. Mir sind dä inen separate Rum bracht worde, döt isch dä wieder e Nurse cho und hät eus nomal all mögliche Frage gstellt, unter anderem öber e Central Line hät, jop en Hickman. Sie hät sich dä als grosse Schwiiz Fan goutet, sie seg erscht grad drü Wuche i de Schwiiz und Österrich gsi.

De Liam hät dä müesse Konstrastmittel trinke bzw. über sini Sonde zue sich näh oder wies da heisst G-Tube. Das macheds da schinds gar nöd, sondern schaffed immer mit Magesonde dur d Nase. Mir sind froh, dass de Liam sin G-Tube hät, das erliechtered sehr viel. Biser die 200ml trunke hätti, wärs es Zitli gange. Nachher hämer 2 Stund müesse warte, bises is CT gange isch. De Liam hät dä churz bevors losgange isch afange schlafe, das isch dä nöd so günstig gsi aber er hät ja dä nach de Narkose no chli chöne schlafe. Es sind dä no 2 anderi Nurses und e Anästesistin cho und all händ nomal gfrögt ob er e Central Line hät, dä frögtmer sich e chli für was mer so Formular usfüllt. 🙂

Churz vorem zwei ischs dä äntli is CT gange. De Liam isch dä ufem Arm vo de Tiffany igschlafe und dä händsen chöne alege. Mir sind dä wieder in Rum zrug go warte. Er isch dä rächt zackig wieder zrug cho und es isch alles guet gange. Es isch dä wieder e anderi Nurse cho, d Jordan, sie hät eus dä druf agsproche, dass mir doch Schwiizer seged. Das seg uf ihrere To-Do Liste zum bereise. Sie isch die erst gsi, wo sich über de Trump güssered hät aber au nur ganz churz und knapp, es ischere glaub meh usegrutscht, als dass sies hät welle säge. Ich nime a sie döfed sich nöd gross politisch üssere. Irgendwie simer dä druf cho, dass sie vo North Carolina isch, gnauer vo de Outer Banks, döt wo all Nicholas Sparks Film dreht werded. Im Kispi gits en grosse Fan vo dene Film. 😉

Es isch dä no e zweite Nurse usem Süde dezue gstosse, eini us Gerogia und dere hätmers au am Dialket agmerkt. Sie isch e Travel Nurse und reist im ganze Land ume vo Spital zu Spital für jewils e paar Wuche. Mir händ dä no chli gschwätzt während de Liam no am pfüsele gsi isch. Irgendwänn häter dä aber glich müesse ufwache, will mir händ ja no en Termin mit de Frau Dr. Gardner gha am 15.30 Uhr im 8. Stock. Dobe acho isch de Liam immerno chli müed gsi und hät e Banane welle, er hät ja vor de Narkose müesse nüchtern si. Banane hämer aber leider nöd im Agebot gha. Da häter no müesse warte bismers Gspröch gha händ. Das isch au nöd lang gange aber defür um so erfeulicher.

D Dr. Gardner hät dä scho d Resultat vom CT gha, mer gsechi kei grossi Pilzherd meh, es gsechi also sehr guet us! Das sind natürli super News gsi. Das heisst er brucht au kei Ambisome meh, willer mitem Noxafil gnueg abdeckt isch und en guete Spiegel hät. Und solang sini Leberwert nöd stiged chaner au ufem Noxafil blibe. Sini T-Zälle sötted afangs nächst Wuche igfrore werde und wänn alles nach Plan lauft sötter die Endi Januar, afangs Februar übercho.

Gäge die  Vieri simer fertig gsi und sind dä no gschwind go poschte. De Liam hät au no sini Banane übercho.

Mir händ hüt zur Abwächslig mal sälber gchoched. Tiffany hät Spätzli gmacht für sich und de Liam und ich ha Broiled Lobster Tails gmacht, die sind unglaubilch guet gsi und stinkbillig. Womer dä langsam fertig gsi sind mit choche, isch usem Wohnzimmer immer wieder so en komisch nervige Ton cho, hät ufghört und wieder agfange. Irgendwänn hämer dä zum Glück gmerkt, dass das de Rauchmelder isch und händ glüftet. Mini Lobster Tails händ chli viel Rauch erzügt im Bachofe. Aber alles halb so wild und es sind au kei Firefighters go chlopfe cho. De Liam isch dä au wieder fit gsi und hät schowieder möge Seich mache.

Morn hämer euse ersti spitalfrei Tag sit Endi November.

Zum Schluss, eus freuts extrem wie gross d Ateilnahm isch und wieviel Lüt de Blog jede Tag läsed. Danke vielmal!

Guet Nacht…

Rainy days…

Es hät au hüt morge wieder grägnet und mir verstönd langsam wieso Seattle de Ruef hät, wos hät. Aber es isch immerhin meistens nur en Nieselräge. Womer i de Mountain Clinic acho sind, hät eus Kayla wieder in Empfang gno, sie lat eus immer zwüsche ihrne Arbetsplätz durehusche, dass mer nöd alles rundume müend laufe. Das mal häter zerscht Zoffran gäge d Übelkeit becho und nachher d Chemo.

De Liam hät hüt extra en Arsenal Pulli agleit, leider hät das au nöd ghulfe und Arsenal isch usem FA Cup usegfuhled und das als Titelverteidiger. Ich hanems aber nöd gseit. Hanem sini guet Lune ja nöd welle vermiese. 😉

Während em Ambisome hät de Liam chli gmaled und am Mami stolz sis Kunstwerk präsentiert.

De Liam hät dä womer gange sind, no en Sticker übercho willer so en brave gsi isch und willsen mit sinere Chape und de Jagge so herzig gfunde händ. Er isch au immerno sehr ufmerksam wiemer im nachfolgende Video gseht.

Tiffany isch dä trotz em grusige Wätter go Jogge, de Liam hät i dere Zit pfused und ich ha chli Playoff Football glueged.

Am Abig simer dä extra früeh is U-Village abe go ässe, wills dänn no fascht kei Lüt hät. Isch gmüetlich gsi wiedermal usser Hus z ässe. Tiffany und ich händ dä je no es Bier gno, es Shorty, dases so chli isch, hämer beid nöd dänkt. Aber defür isches um so feiner gsi.

De Liam häts au gnosse. De Song, wo gad glofe isch, hätem so guet gfalle, daser afange tanze hät.

Nachher simer wieder in Räge use und de Liam hät unbedingt welle Hei laufe trotz Räge, Tiffany hättem eifach immer wieder müesse Kapuze ufe tue. Er isch bis zur helfti vom Heiwäg glofe, vorallem isch das de steili Teil gsi aber mer hätem nöd döfe hälfe au wäner amigs fascht gstolpered isch, er hät das welle allei schaffe.

Ihm gahts immerno sehr guet und morn gits hoffentli s letscht mal Chemo für es Zitli. Mir sind froh gsi, dases hüt nöd so en lange Tag gsi isch im Spital, will morn wirds wieder es volls Programm gäh. Drum isch jetzt Lilö.

Guet Nacht…

 

University of Washington…

Hüt hät d Dolmetscherin wiedermal uf eus gwartet bi de Registration im 6. Stock. Es isch aber es Missverständnis gsi, ihre isch gmulde worde, dass mer hüt s CT händ aber das isch ja erscht am Mäntig. Aber sie isch dä blibe, will es isch ja scho zahlt worde. Mir händ dänkt sie chunt sowieso nüme, sie hät inere Wuche Geburtstermin.

Wills wieder zwei Täg her isch, isch hüt wieder öpper de Liam go untersueche cho, e Nurse Practitioner. Bevor sie aber mit eus afange rede hät, hät sich d Dolmetscherin bi ihre vorgstellt und gseit sie blibi im Hintergrund und sägi nur öppis wänn gwünscht. Das muess bi dere Nurse irgend en Schalter umgleit ha, will sie hät nachher mit eus gredt als wäremer nöd ganz normal. Zu jedem Wort hät sie mit de Händ no Zeiche gmacht.  Tiffany und ich händ eus nur verdutzt agluegt. Wo sie gfrögt hät, ober guet isst und trinkt, hät sie mit de Händ so ta als wür sie öppis ässe und trinke. Und hät ganz langsam und abghackt gredt. Wo sie wieder gange isch, hämer nur no chöne drüber lache, sie isch dä no zweimal cho, bim 3. Mal hät sie dä glaub gmerkt, dass sie au normal mit eus cha rede. Am Liam gahts immerno sehr guet für das daser Chemo übercho hät, er hät immerno Appetit, es ischem bis jetzt nöd schlächt worde und Fieber hätter au no kei gha. Mir händ hüt wiedermal d Kayla gha als Nurse, da sie viel go jogge gaht, hät sie de Tiffany gad no paar Tipps chöne gä, wo die schönste Streckene sind.

De Liam hät zum Abschied no es Büechli vom Grosi und Grosspapi becho und hätmer dä chli drus vorgläse. Ich känn jetzt 5 Farbe uf änglisch und cha uf 10 zähle.

De Liam hät näbem Ambisome und de Chemo dä wieder Bluetplättli brucht, uf die hämer dä es Zitli müesse warte, s Benadryl häter i de zwüschezit aber scho übercho.

Am 14.15 Uhr simer dä au fertig gsi und händ gfunde mir chönted mal de Campus vo de University of Washington go aluege. Für das simer dä es zitli glofe. Ich hamer das rächt prunkvoll und prestigeträchtig vorgstellt. Villicht ischs Wätter gsi aber mir händs eus schöner und idrücklicher vorgstellt.

Zum Abschluss vo eusem chline Usflug simer dä no es Frozen Yogurt go ässe im U-Village.

Vorem Super Market häts es paar Studente gha wo eim Ichaufsliste id Händ druckt händ mit Sache druf wos nachher de Bedürftige verteiled. Mir händ eus für Windle und Peanut Butter uf de Liste entschiede.

De Liam hät dä am Abig no fliessig Brown Rice gässe. Er blabered immer meh und mer verschrickt amigs waser alles scho für Wörter kännt und er druckt sich au immer klarer us. Villicht schaffts morn ja e Chostprob uf de Blog.

Drü Königschueche häts hüt leider keine gäh aber mir wüssed au so wer euse König i de Familie isch. 🙂

Guet Nacht…

 

Protein…

Business as usual hüt. De Liam isch zwar sälber ufgwacht, hät dä aber gfunde er well jetzt lieber no chli schlafe.

Mir sind dä aber pünktlich im Children’s gsi und d Abby hät dä de Bolus aghänkt. Uf s Ambisome muemer amigs chli warte, das isch für sie glaub rächt speziell und muess immer i de Pharmacy une bstellt werde.

De Liam und Tiffany händ sich hüt gägesitig chli gärgered, er seg schinds flach uf de Bode gläge willer s Armbändeli nüm hät welle a ha, wo ich go s Zmorge hole bi. Aber das hät sich dä schnäll wieder gleit, es händ halt beid de glich stur Chopf. 🙂

Mir händ dä zäme chli Pingu gluegt, zum Zit totschlah.

Während em Ambisome isch dä wiedermal d Ernährigsberatig cho in Form vom Garret, super nette Typ. Er hät eus gfrögt wie s lauft mitem ässe. De Liam isst ja wieder meh aber halt vorallem Pommes Frites, Öpfel und Banane. Döt häts aber fascht kei Protein drin.  Ine isch das aber extrem wichitg, dass d Chind usgliche ernährt werded. Er hät so uf dem Protein umegrite, dasmer chönt meine er wott de Liam für de Mister Universe Wettchampf fit mache. Aber mir probiereds jetzt mal mit sine Vorschläg, Peanut Butter und Bohne. Vo Fleisch ischer ja bis jetzt nonig so Fan. Sini Öpfeli gits zum Glück gad abpackt im Chüehlschrank im Snack-Egge.

D’Chemo isch dä nur e viertel Stund glofe. Scho verruckt was so e chlini Sprütze cha bewürke.

Chum simer dihei gsi, isch Tiffany wieder go jogge. Wow. De Liam und ich händ i dere Zit Nap Time gha. Ich bin dä is Gym wo Tiffany wieder zrug gsi isch. Ich glaub die händ döt es Problem mit Diebstähl.

Mir händ eus dä am 15.30 Uhr wieder vorem Spital troffe, mer hät de Verband vom Hickman müesse wächsle und Home Care hät nur am Namitag zit gha.

Willmer nur eimal döt gsi sind i de erste Wuche, hämer dä chli müeh gah zums finde. Aber nachdem mir im falsche Stock gsi sind und döt gfröged händ womer anemüend, hämers dä gfunde. Gfunde hämer döt au no es Bild vo de Tiffany. 😉

Bim zrug laufe hämer dä wieder so en Moment erläbt. En Typ hät mit sinere E-Zigi Rauch useblase, ohni eus z gseh. Mir sind dä gad dur die Rauchwulche glofe, woner eus mitem Chinderwage wahrgno hät, hät er gad probiert de Rauch weg z fächere und hät sich hundert Mal entschuldigt. S Lustige isch, mir händ ihn bim loslaufe vom Chinderspital 10 Minute vorher no gseh und er hät irgendwie no strub usgseh mit de Tattoos im Gsicht und sine Hip-Hop Klamotte.

Es hät de ganz Tag grägnet, ich glaub de Liam hät sogar dine no s gfühl gha es rägnet.

Jetzt simer gspannt wiener morn wird reagiere ufs Ara-C. Letscht Wuche häter am 2. Tag afange Fieber übercho.

Guet Nacht…

 

 

Grandma and grandpa…

Fühlt sich immer no komisch a 2018 im Titel zschriebe. Aber Zit lauft halt und jetzt simer au scho über zwei Wuche da. Ich wür säge, mir fühled eus fängs zimli wohl da und mer kännt eus au fängs chli im Spital, mir werded emal immer wieder mal grüesst.

Hüt ischs eus schowieder chli eifacher gfalle zum Ufstah. Bevor mir aber los sind, hämer mine Eltere no tschau gseit, willmer nöd gwüsst händ, ob mer zrug sind, bis sie abholt werded vom Uber. Mini Eltere sind i dere Zit richtigi Uber Fans worde. De Liam hät natürli nöd welle tschau säge aber das kännt mer ja amigs bi ihm.

I de Mountain Clinic acho hämer churz müesse warte. Mer muess sich dä immer go amälde und chunt dänn es Armbändeli über. Dezue gits immer die glich Frag: Has your child a new rash, fever or has been exposed to chicken pox in the last three weeks? Nope. Und scho simer wieder i eusere Bucht gsässe. De Liam isch dä glich no biz müed gsi.

Mit e chli Schum gahts eim dä aber gad besser.

Nachem Ambisome isch dä no d Frau Dr. Leger verbi cho zum de Liam untersueche und Bluetwert zbespräche. Die rote Bluetkörperli sind stabil blibe und Bluetplättli sind wieder gsunke, allefalls bruchter morn wieder. Sin Posaconazol (Pilzmittel) Spiegel isch äntli wieder gnueg höch. Dä hät ja i de Schwiiz scho nie würkli welle stiege, bis mer jetzt da, druf cho sind s Nexium abzsetze. Jetzt warteds no s CT ab und wänn das guet isch, dä chönds s Ambisome absetze. Morn fangemer wieder miteme Block Ara-C a, wieder 4 Täg lang Chemo. D Hoffnig isch, dasser nacher bis zu de Gab vo de Zälle, kei Chemo meh brucht.

Will am Liam sini wisse Bluetkörperli ja wieder so tüf sind und er neutropen isch, muess er jetzt wieder e Maske träge aber defür eini mitem Mickey Mouse druf.

Mir händs dä sogar no Hei gschaft, bevor mini Eltere gange sind und händ eus so nomal richtig chöne verabschiede, das heisst de Liam nöd, de hät gschlafe. Er hät dä dur de Tag no paar mal gfröget wo s Grosi und de Grosspapi sind. Und dä simer nur no z dritte gsi.

Tiffany hät dä tatsächlich ihri Drohig wahr gmacht und isch go jogge. Nachdem sie zrug gsi isch, bini dä sälber no churz is Fitness, es hät eis gad um de Egge, isch zwar chli schmudelig und gwüssi Grät gheied fascht usenand aber hät alles wo mer brucht.

Am Abig simer dä in Met Market go Znacht poschte, am Liam sini Pommis händs gad früsch gmacht. Und er hät sie dä i volle Züg gnosse.

Guet Nacht…

Burke-Gilman Trail…

Hüt händ zwei vo drü nöd so richtig möge ufstah. De Liam isch nöd mal verwached womeren gwickled und agleit händ. Woners dä aber gsi isch, hätters dä nöd so lustig gfunde. Er hät halt im Spital jetzt amigs chöne usschalfe.

Hüt isch nur Ambisome ufem Plan gstande, mir müend eus aber jedesmal wänn eus öpper neus betreut duresetze, dass s Ambisome über ei statt zwei Stunde laufe glah wird. Das hät d Tiffany dä probiert, während ich am Zmorge hole gsi bin und d Nurse hät dä gmeint, sie müesses go abkläre. Tiffany isch da halt amigs nöd so diplomatisch. Wo Tiffany dä mal churz weg gsi isch, isch dä d Nurse nomal cho zum de Bolus go ahänke und nacheme churze Schwatz über d Schwiiz und wie schön Luzern isch, ischs dä keis Problem meh gsi nur über e Stund laufe z lah.

De Liam hät dä wieder sin Schum übercho, sis Englisch isch au immer besser und höflich ischer au no.

Wiemer ufem Video gseht, hät de Liam no chli roti Auge, das isch willer sich immer i de Auge gribe hät, wos so Gschwulle gsi sind.

Wämer i dene Infusionsbuchtene sitzt und so nöch ufenand obe isch, chuntmer unuswichlich au Züg vo anderne mitüber. Es nämed schinds nöd all so gnau mit de Nüechternzite. E Patientin het sölle en Zuckertest mache und sit 8 Stund nüechtern si, hät dä aber lut Muetter am 05.30 Uhr no öppsi gässe. Tochter sälber hät dä aber no nagleit und gseit: “nei Mami ich ha doch am 7i au nomal Zmorge gässe.” Sie händ dä wieder chöne gah und en neue Termin mache. Mir händ dä sälber no es Telefon becho wäg de Nüechternzite, das gebeds eim amigs per Telefon dure, de Liam hät ja am Mäntig s CT.

Hüt simer zur Abwechslig mal vorem Mittag wieder dihei gsi und es isch wieder strahlend schöns Wätter gsi. Aso hämer entschiede no chli use z gah. Mir sind dä uf de Burke-Gilman Trail go laufe. Das isch en Wäg wo um ganz Nord Seattle füehrt. Mir laufed uf dem au immer zum Spital. De wird au vo Velofahrer, Jogger, Spaziergänger gnutzt. Mitem Velo chuntmer da sowieso super vorrah.  Dasmer d Limebikes au legal nutze chönd, hämer hüt no Velohelm kauft, das isch da Gsetz.

De Liam hät hüt richtig guet möge und isch sicher e halb Stund am Stuck mit sim Buggy glofe, ganz stolz. Es isch au gnueg warm gsi, dass die dünni Chappe glanged hät.

Es isch natürli die ganz Truppe debi gsi.

Nach dem Marsch isch de Liam dä mega kaputt gsi und hät en lange Namittagsschlaf gmacht. Am Abig hämer dä es letschts mal z füfte zäme gässe, bevor mini Eltere morn wieder zrug id Schwiiz flüged. Sie händ eus i dere Zit unglaublich viel ghulfe und unterstützt, mir sind ine unendlich dankbar. Es wird für all en schwierige Abschied. De Chli wird dä sicher no es paar Täg fröge wo s Grosi und de Grosspapi sind.

Morn gahts dä glich witer wie hüt, plus no es Gspröch mitem Arzt, zum luege wies am Liam gaht.

Guet Nacht…

Discharged…

Hüt isch früeh Tagwach gsi, am 8i sind Tiffany und de Liam scho ufem Gang gsi. De Liam hät wieder e gueti Nacht gha und isch drum am Morge früeh scho fit und munter gsi. Sini Auge sind au wieder fascht guet gsi.

Ich bin dä am 5 vor 9i au im Spital gsi, i de Anahm, dass dä bald d’Visite startet. Usgrächnet hüt isch sie dä erscht am viertel vor 10i gsi, defür sind dä irgend 7 Lüt im Zimmer gstande. De Oberarzt, zwei Assistänzsärztinne, e Nurse Practitioner, d Erin (Tagespflegerin) und zwei Persone mit PC, womer nöd würkli gwüsst händ, was die döt gmacht händ. Sie händ dä nomal bestätigt das s Fieber zimli sicher vom Ara-C gsi isch. Sini Bluetwert sind chli tüf gsi und drum händs dä no Bluetplättli und roti Bluetkörperli planed für de Tag. Nachdem das aber alles dine seg, chöngemer Hei. Die wisse Bluetkörperli seged meh oder weniger usglöscht worde, die guete wie au die schlächte. Aber das isch ja so gwollt gsi. Am Fritig isch wieder Ara-C vorgseh, wie de witeri Plan gnau usgseht erfahremer dä hoffentli morn. Das heisst, dass mer dä wahrschinli übers Wuchenend wieder ichecked in 7. oder 8. Stock. Im 7. Stock isch au s’SZT vom Spital, sind alles au normali grossi Zimmer. Apropos, vom SZT hämer au no ganz e liebs Email übercho mit guete Wünsch fürs neue Jahr, über das hämer eus au sehr gfreut, viele Dank!

Vor de Visite hämer no Zmorge für eus drü bstellt, das isch dä irgend am 10i cho. Und es isch überraschend guet gsi, fascht wie ime IHOP (International House of Pancakes).

Immer wänn de Liam im Spital isch wotter de Schum vom Kaffi, ich ha usegfunde, dass wämer im Starbucks de Cappuccino “Extra Dry” bstellt, meh Schum überchunt, perfekt für de Liam.

Nachem Zmorge isch dä Tiffany Hei sich go früsch mache und dä no chli is University Village abe, zum mal chli use cho.

Am viertel vor 11i isch dä öpper vo de Children Life Abteilig cho, das sind die mit de Spielsache. Sie hät dä akündigt, dass Busy Bees am 11i i de Family Lounge verbi lueged. Das isch e Truppe vo Fraue wo Music mached, Büechli vorläsed und bastled mit de Chind. De Liam und ich händ dä aber zerscht no mim Göttibueb mit Facetime alles Gueti zum Geburtstag gwünscht. Womer ufghänkt händ, hät de Liam nüm welle ufhöre vo sim Cousin z rede. Nachher ischs dä id Family Lounge gange. Döt isch scho alles parat gstande. 4 chlini Stüehli, jede en anderi Farb. En Bueb isch döt scho am höckle gsi und hät gwartet bises afangt. De Liam hät sich dä de blaui Stuehl usgsuecht. Losgange ischs mit chli Music und gsang. De Liam hät sich aber nöd so mitrisse lah, es sind ihm glaub gad chli z viel fremdi Lüt uf eimal gsi. Chum isch d Music aber fertig gsi und d Büechli verteilt worde, hätter gmeint “meh Music”. Nachem Büechli vorläse, isch dä Bastle dra gsi. Alles isch strikt dureplaned gsi, das ischmer ufgfalle wo die eint cho isch und gseit hät, er heg jetzt no e Minute Zit zum fertig male. Nachem Bastle häts dä no zwei Songs gäh und dä isch fertig gsi und so schnäll wies da gsi sind, sinds au wieder weg gsi. Aber für d Chind ischs super, dass so öppis mached. De Liam hät die ganz Zit no gseit, “meh Music”, sie hät ja schliesslich au mitere Gitarre Music gmacht und er hät ja sälber eini.

Aber es isch dä sowieso Zit gsi für d Bluetplättli, vorher häts, isch ja klar, Benadryl geh und ebe so klar isch gsi, dass er gad wieder igschlafe isch. Vorher häts aber no paar Spätzli gäh, die sind au hüt no fein gsi. Mir händ dä au no gad usegfunde, dass eusi Nurse d’Erin en dütsche Ehema hät und ihre Onkel Schwiizerdütsch cha, das het sie au vorher chöne säge. 😛

Während Tiffany no chli am shoppe gsi isch, hät mir min Vater dä chli Gsellschaft gleistet. Irgendwänn isch dä au no s Bluet aghänkt worde, nach dem d’Plättli dure gsi sind. De Liam hät friedlich witer pfused. Tiffany isch dä bald au wieder da gsi und de Liam irgendwänn mal wieder verwached.

Hüt hätmer wieder super Sicht uf de Mount Rainier gha vom Zimmer us, eine vo de höchere Berge vo de USA.

Es isch dä 17.30 Uhr gsi und de Liam hät sis Bluet dine gha. Wo d Erin gseit hät, dass mir döfed gah, hät de Liam gad afange goisse willer sich so gfreut hät. Wobi er sich jetzt au scho langsam wieder dra gwöhnt, hät aber dihei isch natürli scho schöner. Während de Liam, Tiff und mini Eltere scho fängs Hei sind, ha ich dä no uf d Medis i de Pharmacy gwartet, wo erst am 6i abholbereit gsi sind. Willer Neutropen isch und er Fieber gha hät, wänds daser no 2 Wuche witer Antibiotika nimmt. Tiffany hätmer dä no aglüte, ich söll doch nacheme Schlarpe usschau halte, de müessi irgendwo mal usem Buggy gheit si. Ich hanen dä au tatsächlich gfunde, isch aber au sehr prominänt ufem Troittoir gläge.

Jetzt simer happy dasmer all wieder dihei sind. Morn wärdemer dä wieder zur gwohnte Zit am 8i uf de Mountain Clinic erwartet.

Guet Nacht…

Happy New Year…

Vom Fürwerch hät mer leider nöd viel gseh aber defür häts e heissi Schoggi und Snacks gäh.

Hüt hät de Tag mit de Visite am 09.05 Uhr agfange. Wobi eigentli mit de Ninja Nurse, wo lut Tiffany usem nüt näbem Liam sim Bett gstande isch und d’Tiff fascht zu tode erschreckt hät. D Nacht isch guet verlofe und d Ärzt sind zfriede. Abgseh vo de Bluetplättli sind sini Wert ok, er hät dä am 5i am Morge Bluetplättli becho. Durs Fieber sind die halt verbrötlet worde.

Hüt Morge hät de Liam no chli schlimmer usgseh als gester am Morge. Mer hät s Gfühl die gsamt Flüssigkeit sammled sich i sine Augelider. Obwohl Tiffany glueged hät, dass d’Flüssigkeit ufs minimum abegstellt wird.

Je länger de Tag, desto besser ischsem gange. Er hät dä sini Standard Ration Ambisome übercho und no s letscht Mal Ara-C. Gäg de Mittag häter dä au s erst mal sit 2 Täg wieder Hunger und Appetit becho. Er hät sich Hamburger mit Pommi gwünscht und Ketchup natürli. De Hamburger Wunsch hämerem chöne erfülle mitere Bstellig i de Spitalchuchi, Pommes Frites händs erstunlicherwis nöd uf de Charte. DIe sind dä aber dur s Grosi und de Grosspapi gliefered worde, wo extra no in Met Market sind defür. S Grosi hät au no Spätzli koched. Er isch dä happy gsi und hät chli vo allem probiert.

Nach de stärchig häter dä wieder gnueg Energie gha zum uf de Gang gah. Mir händ dä öppis entdeckt wonem scho im Kispi immer freud bereitet hät. Au wäner nöd all zu viel gseht hät wäg sine gschwullene Auge.

S Wätter isch hüt wieder herrlich gsi. Schinds relativ sälte für die Jahreszit.

De Liam isch super druf gsi und hät de ganz Tag kei Fieber gha und au nüm müesse erbräche. Während s Grosi und de Grosspapi uf de Liam ufpasst händ, sind mr in Met Market euse z Nacht go poschte. Döt hämer dä sogar no es Stück Heimat gfunde.

Im Fernseh isch dä no Football glofe womer wieder zrug gsi sind, chum gseht de Liam Football, meinter er gseht mich und de Grosspapi im Fernseh, willmer ihm gester gseit händ, er söll s Spiel luege und dä gsehter eus. Vorem is Bett gah häter dä nomal chli uf de Gang welle und hät no de Rest vom Fuhrpark entdeckt. Die sind aber nöd ganz sini Gwichtsklass gsi, mit dene hettet sogar Tiffany und ich chöne es ränne mache.

Am Abig isch dä au nomal de Arzt verbi cho, wo scho ufem Notfall eus go bsueche isch und häd nomal es paar vo sine beste Witz zum beste gäh. Tiffany hät aber au susch no es lustigs Erläbnis gha wo sie vergässe hät d Tür bim WC im Gang abzschlüsse und öpper  andersch au ufs WC hät welle, die isch dä aber schnäll wieder dusse gsi. So chamer sich au en Name im Spital mache. Mir händ dä irgendwänn gfunde eusi Nurse Kelsey isch au scho cheibe lang am schaffe. Sie hät eus dä gseit, dass sie immer 12 Stunde Schichte händ, defür aber nur 3 i de Wuche. Mir händ no dänkt, mer gseht nie die gliche Lüt am nächste Tag.

Wänn de Liam kei Fieber meh macht, dä söttemer morn eigentli wieder Hei chöne und no die letschte Täg mit mine Eltere e chli chöne gnüsse.

Zum Schluss vom Tag häts dä no e freudigi Überraschig us de Schwiiz gäh, nöd nur hät s’PSB a Wiehnachte a eus dänkt, sondern au a Neujahr. Viele liebe Dank für s Mail und d Föteli! Au viele Dank für all die Kommentär womer jede Tag überchömed. Es isch immer en Ufsteller wämer am Morge verwached und gsehnd das öpper a eus dänkt.

Guet Nacht…