Wheels on the bus…

Mir händ tatsächlich duregschlafe. Womer ufgwacht sind, hämer gseh, dass mer wieder d Sol als Nurse händ. D Ali hät gluegt, dass mer sie überchömed, sie hät halt e riese Erfahrig und das strahlt sie au us. Das hätmer dä au wieder bi de Visite gmerkt, wie sehr d Ärzt au uf sie igange sind. Am Liam sind Puls isch i de letschte zwei Täg ehner wieder chli agstige, cha si das er i de Bluetgfäss wieder chli trochner isch, obwohl er am Morge immerno sehr ufgschwulleni Auge gha häd. Us de Buchdrainage isch wieder chli meh Bluet usecho, drum händs dä chli meh Bluetabnahme dur de Tag verodned, zum das verfolge. D Buchdrainage git im Moment eh nüm so viel her wie au scho, das heisst, dass entweder eifach weniger Flüssigkeit im Buch isch oder irgendwo verstopft isch. Sie händ dä d Drainage gspüehlt, verstopft schint sie nöd z si. De Buch tunkt eus aber au chliner. Sie sind aber zfriede gsi mitem Liam sim Zuestand.

Hüt händ d Tiffany und ich eus mal e Uszit gönnt, natürli nöd glichzitig, öpper vo eus blibt ja immer bim Liam. Wies schint isch de Samstig eusi Coiffeur Tag, ich letscht Wuche,  Tiffany hüt. Eis chani scho vorweg neh, Foti gits leider no keis aber es isch witus weniger radikal als min Wächsel. Villicht verwütschi sie ja morn. 🙂

De Liam isch hüt am morge scho so fit gsi wie gester Namittag und isch lang wach gsi. Ich han dä gfunde, wänni scho die Akkörd vo de Evelyn becho han, dä mueniss au bruche. Ich han dä churz güebt und nachher am Liam “Wheels on the Bus” vorgspielt, mit Gsang! 😛 Mis Glück isch, dass sis Lieblingslied nur 2 Akkörd brucht. 🙂 Ihm schinds aber gfalle z ha.

S Gotti hät ihn nachher mit Büechli vorläse unterhalte, jedes Mal wänn sie fertig gsi isch, hät er no eis welle ghöre aber das isch ja super. Mir händ dä au no chli Seifeblase gmacht und für de Liam knättet, er hät immerhin mal es “isch das?” usebracht wonem e Crepe gmacht han us blauer Knätti. Er hät also nomal chli besser möge und isch wacher gsi. Ich han dä no probiert sini Glänk chli z bewege, wehre hät er sich emal au chöne. D Sol hät no gseit, mir müessed ihn hüt chli probiere z bewege, so guets gaht, das hälfe au d Flüssigkeit chli besser z verteile und z verlüre.

Will d Herzdrainage chli meh usegä hät als au scho, händs no es Echo mache la, das hät aber zum Glück zeigt, dass es nöd meh Flüssigkeit um sis Herz hät als bim letschte. D Niereärzt sind dä au no verbi cho und sind au zfriede mitem Liam.

Liam hät au hüt wieder Bluetplättli, Plasma und roti Bluetkörpeli brucht. Durs bewege isch aber immerhin im Gsicht nüm so ufdunse gsi. Wo s Mami zrug cho isch, händs dä no müesse de Verband a de Hand wächsle, de isch chli rot gsi und sie händ nöd welle, dass es döt drunder bluetet, häts aber zum Glück nöd. Ich hanen während dem probiert mit chli Musig z beruhige. De HighFlow händs vo 14 Liter uf 10 Liter abegstellt, mir beid gfunde, wow gad e so aber sie händ gseit, sie müenden chli pushe und bis jetzt hät er sich super ghebt.

Während d Tiffany und de Grosspapi im Spital blibe sind, sind mir mal uf Downtown, dass d Stephi doch au no e biz öppsi gseht. S Wätter isch au super gsi defür. Mir händ dä de Matt und Katie troffe und de Matt hät eus in Amazon Hauptsitz inegno, ächt cools Gebäude, vore usse sind gad no die neue Sphere Glaschuglene.

Stephi und ich sind dä uf d Space Needle, weniger fürs Grosi gsi, leider sinds aber gad am umbaue und mer hät nur e sehr igschränkti Sicht gha aber defür isch die gewaltig gsi.

Vorem Pop Culture Museum häts dä au no es Föteli vo Mami und Sohn gä. 🙂

Matt und Katie sind dänn aber scho richtig Spital unterwägs gsi und sind de Liam go bsueche. Sie chömed eus mindistens eimal i de Wuche go bsueche. So lieb.

Am Liam isches immerno guet gange und er isch am Abig au nomal chli wach gsi und hät möge chli Minions luege, dä wird irgendwie vo Mal zu Mal lustiger. De Liam isch immerno sehr sensitiv was Flüssigkeit abelangt, drum müends au sehr vorsichtig si, wänns Flüssigkeit mit de CRRT useziend. Er macht für eus aber scho en bessere Idruck und schlaft nöd nur de ganz Tag.

Morn gaht s Gotti leider schowieder, de Liam wird sie sicher au vermisse, er hät sie amigs rächt fokussiert wo sie näbem Bett gstande isch. Aber au mir natürli, sie hät au eus sehr guet ta, es vertrauts Gsicht meh um eus ume isch immer schön und ihre häts glaub au guet gfalle. Sie isch glaub sogar en chline Seattle Fan worde. 😉

Guet Nacht…

Dr. Tom…

Wieder e gueti Nacht, nur um die 3 hämer müesse ufstah will de Liam Schmerze gha hät und sie de arterielli Leitigs Verband händ müesse wächsle. Obwohl er regelmässig Schmerzmittel bechunt, hät er no Schmerze gha. Das hämer dä au uf de Visite erwähnt und es isch dä en Schmerzmittel Tropf verordnet worde, das hätem i de Schwiiz au immer guet ghulfe. D Onkoärzt händ dä au gmeint, vo de Zit her wür Mukositis gnau passe. Es isch luschtig, de Liam isch lang vo Mukositis verschohnt blibe, bis zu de Chnochemarktransplantation, döt hät ers s erscht mal richtig gha nach de Konditionierig und ab dänn jedes Mal rächt heftig, wie au jetzt. Viel mache dägege chamer leider nöd.

Sini Bluetgrinning isch nonig ganz wie sie sött si, drum chunter relativ viel Plasma und au immerno viel Bluetplättli über. Da aber immerno chli öppis us de Drainage chunt, bruchter eh Nachschub und das macheds am liebste mit Bluetprodukt.

Ihm isch am morge nonig so wohl gsi, sie händ aber au de Tropf nonig aghänkt gha. Sie sind dä no vo de Physio cho, sie vo gester hät sich schinds chli Sorge gmacht, dass de Liam so verchrampft gsi seg drum chömi sie jetzt au no go luege, mir händ dä gseit, dass seg will er angst vor Fremde hegi, wo ihn welled alange (guet wer wird scho gern vo Fremde aglanged). Uf jede Fall hämer ihre dä chöne zeige, dass de Liam sini Glänk immerno guet cha bewege und das er nöd so verstift seg, wie sie dänkt heged. Sie händem dä spöter aber glich so en Art Stiefeli bracht, zum sini Füess ime 90 Grad Winkel z bhalte, dass sich sini Sehne nöd verchürzed, die muener jetzt amigs eifach chli a ha. Währends de Stiefel agleit händ, isch d Eveyln vo de Musig Therapie go spiele cho, ganz süferli und lislig zum de Liam z beruhige. Mir sind dä no druf cho, dass ich au e Ukulele han, d’Evelyn isch dä vollends begeistered gsi und hät abote, mir am Namittag d Akkörd vom Liam sine Lieblingslieder z bringe, so nett.

Geg de Mittag ischsem dä mal wieder nüme so guet gange, sini Sättigung isch plötzli rächt gheit und au sin Bluetdruck isch wieder rächt tüf gsi. Sie händ dä de HighFlow wieder chli ufegstellt und er hät sich dä wieder stabilisiert. Irgendwie hät er das mängisch, keine cha aber rächt säge wieso.

De Dr. Tom isch hüt wieder euse zueständig Resident gsi und isch susch eigentli ganz zfriede gsi mitem Liam, er hät am morge au wieder bissled gha. De Tom isch dä au no chli bi eus blibe und hät no chli gschwätzt mit eus, er bringt eus immer wieder zum lache mit sinere Art. Leider ischer nur no bis nächst Wuche uf de ICU.

Am Namittag isch dä d Evelyn tatsächlich nomal verbi cho mit de Akkörd und hätmer no paar Tipps gä, villicht cha sie mir ja mal paar Stunde gä. 🙂

De Liam hät mittlerwile sin Schmerzmitteltropf gha und das hät ihm richtig guet ta, sie händ dä aber glich no müesse sin Hickman- und Herzdrainageverband wächsle. Eusi hütig Nurse, wo au Tiffany gheisse hät, hät defür gad no zwei witeri Hälferinne ufbote, da merktmer, dass sie de Liam nonig kännt hät. Eini zum d Händ und eini zum Bei hebe, ich ha dä glaub chli verdutzt gluegt, sie händ mit dä nämli gfröget wiemer das dä susch amigs mached, ich ha dä gseit, eini Wächsled jewils Verband und de Liam lit da, still, fertig. Ich glaub die erläbed rächt viel anders da. Sie händs dä aber sälber gmerkt, dass de Liam das super macht, obwohl sie irgendwie chli lang gha hät, sie hät chli nervös gwürkt, villicht aber au will nomal eini döt gstande isch, wo sie wie prüeft hät. D Tiffany, aso d Nurse, hät wahrschinli eh dänkt sie seg im falsche Film, wo immer wieder anderi Nurses eus go hoi säge und go schwätze cho sind. Eus duets emal guet. De Dr. Tom isch dä au nomal cho und hät dä sicher e halb Stund mit eus gschnädered über Gott und die Welt, er hät dä gseh, dass eusi Nummere a de Tafle stönd, er schribi die jetzt uf, er seg ja nur no bis nächst Wuche da. Mir händ nachher beid es SMS vo im ufem amerikanische Natel gha. 😀 Mir sind dä au no uf de Blog cho und er hät dä churzerhand gad no chli drin ume gstöbered und hät so de Liam au mal chli fitter gseh uf de Fotene.

S Verbandwächsle hät de Liam irgendwie richtig gweckt, er isch nachher so wach gsi wie scho lang nüme und hät eim richtig fokusiert und sogar mal nachem Mami gfröget, wo gad nöd im Zimmer gsi isch. Er hät dä au luscht gha uf e chli Büechli läse und wos erste fertig gsi isch au no es zweits welle. Sini absolute lieblings Büecher im Moment sind, Five Little Monkeys Jumping on the Bed und Tippy the Owl, sind aber au herzig. Er hät sich au chöne motiviere zum chli Zootopia luege. Das hät richtig guet ta.

Sini Vitalwert spinned aber immerno rächt verruckt, mängisch isch d Herzfrequenz rächt höch, dä wieder normal, s gliche mitem Bluetdruck und de Atmigsfrequzenz, er haltet eim immer uf trab.

De Ufsteller vom Tag isch us de Schwiiz cho. S Gotti vom Liam spielt i de Schwiiz Fuessball bim FC Freiebach, ihri Mitspielerinne händ mitübercho, dass d Stephi da bi eus isch und wieso. Unter anderem spielt sie au mit de Fave, wo mir au guet känned, sie hät eus es Bild gschickt wo sie im Training für de Liam gmacht händ. Es hät eus fascht zu Träne grüehrt, so e schöni Geste, die meiste vo ihne kännemer nöd mal und trotzdem händ sie sich so öppis usdänkt und umgsetzt. E wunderschöni Idee wo eus extrem gfreut hät! Danke vielmal mir wüssed das unglaublich z schätze! Drum gönd all go de FC Freiebach go unterstütze, wänns wieder spieled!;)

Am Abig hämer dä wieder d Ali gha, sie strahlt e unglaublichi Rueh us, womer au mit guetem gwüsse cha go schlafe gah.

Guet Nacht…

Pee…

Mir händ s erst mal sit 2 Nächt wieder es paar Stund am Stück chöne schlafe, das heisst es isch e gueti Nacht gsi. Mir händ dä sogar fascht d Visite verschlafe.

De Liam isch dä also am Abig am 11i no ad Dialyse Maschine ghänkt worde. Es hät sich no chli verzögered, will sini Kalzium Level tüf gsi sind, das will er de Tag dur Bluetprodukt übercho hät und s döt ine es Konservierigsmittel hät, wo Kalzium abbaut. Vielfach sinkt de Bluetdruckt wämer ad Maschine chunt oder de Körper reagiert uf de Plastick vo de Schlüch. Beides isch zum Glück nöd de Fall gsi und sie händ gmeint besser heter nöd chöne a die Maschine agschlosse werde.

De Liam hät e gueti ruhige Nacht gha. Er schint aber immerno starchi Schmerze zha, mir gönd schwer devo us, dass er Mukositis hät. D Resident Ärztin Dawn hät ihm dä no is Muel gluegt und das bestätigt. Aber er isch guet mit Schmerzmittel abdeckt.

Als Nurse hämer hüt d Kennon gha, also quasi Nurse und Musigtherapie i eim. D Emily isch eus dä am Morge au no churz go grüezi säge cho. Für die Dialyse Maschine, gnännt CRRT, muessmer speziell usbildet werde, drum isch de Chreis a Nurses nöd so gross.

De Liam isch au de Maschine no sehr entspannt am Schlafe gsi, er lit untere wärme Decki, wills Bluet wo ine flüsst chalt isch. Die Decki, wo Bear Claw gnännt wird, wird dur e Maschine mit warmer Luft ufblase, es gseht rächt kuschelig döt drunder us. Weniger kuschelig sind die zwei zuesätzliche Lume wo bi ihm bim Hals sitzed. De Liam hät jetzt doch paar Leitige, die müends au immer bi de Visite ufzähle, das machemer jetzt au mal. En Hickman, Dialyse Leitig, arterlielli Leitig, Herzdrainage, Buchdrainage, venösi Leitig und no sini Peg-Sonde, also doch es paar.

De Liam hät dä eigentli wieder de ganz Tag gschlafe, wämer a ihm aber umehantiert hät, hät er dä doch mal d Äugli ufgmacht. Dä häter dä au gseh, dass Gotti da isch. 😀 Sie isch hüt wie au Grosi und Grosspapi abwächsligswis bi ihm gsi.

Über d Drainage lauft immer no sehr viel Flüssigkeit ab, er chunt aber au immerno sehr viel devo über. Am Morge isch dä au no d Frau Dr. Ainsley cho, sie isch Teil vo de Studie und verfolgt am Liam sin Verlauf ganz genau, sie hät dä au gfröget ob de Liam scho bissled hät, hätter aber zu dem Zitpunkt nonig. Sie isch aber au z friede mitem.

Will de Liam hüt während de Physio nöd so en entspannte Idruck gmacht hät, hät dä d Kennon churzerhand es paar Liedli agstumme, mer hät s Gfühl mit Musig chaner am beste entspanne.

Mir händem dä über de Fernseh de ganz Tag chli  s Relaxation Programm ufem Fernseh laufe lah. Am Namittag isch dä no de David cho und hät au no chli für de Liam gspielt, de Liam hät sogar es paar Mal gspienzled, schwierig will sini Auge wieder so ufdunse sind vo de Flüssigkeit. S guete a de CRRT isch, mer chan au Wasser usezieh, sie sind aber no sehr vorsichtig demit. Ufem Bild gsehtmer au, mit wieviel Herzbluet de David das macht.

De Tag dur sind eus wieder diversi Lüt go bsueche, d Emily, d Cara isch mehrmals cho, Dawn isch dä au nomal cho mit zwei Schöggeli i de Hand, mir händ am Tom und sim Team gester no paar mini Schöggeli gschänkt. Sie seged verwirrt, sie hegi da zwei Schöggeli e rots und e blaus, sie checki nöd was da de Unterschied seg, will es seg ja beides Milchschoggi, sie seged sogar go Google. Mir händ dä erchlärt, dass es au verschideni Milchschoggene gäbi mit verschidene Füllige etc. und am beste sölli sie eifach beidi probiere, dä merki sie de Unterschied. 🙂 D Frau Dr. Gandhi vo de Onko isch eus au wieder go bsueche, sie hät dä ganz schüch gfröget, wänn de Liam dä d Diagnose becho hegi, ich hanere dä die ganz Gschicht verzellt au, dass s Spital euses zweiti Dihei worde seg und d Lüt döt eusi zweiti Familie, dass mir eus da aber mittlerwile au scho chli wohlfühled, will sich all so um eus kümmered und eus go bsueche chömed wie sie grad. I dem Moment isch dä  gad de Mitchell ineglofe und hät eus lokali Schoggi us Seattle bracht, dass mir au Mal amerikanischi Schoggi chönged probiere, er seg i de Nacht paar Mal verbi cho zum luege wies eus göngi, mir seged aber am schlafe gsi, er seg froh gsi woner das gseh hegi. De Frau Dr. Gandhi hani dä gseit, dass seg jetzt gnau das gsi wo ich gmeint heg.

Eusi Nacht Nurse isch wie letscht Nacht d Ali, sie isch en riese Schwiiz Fan und hät gmeint, wenn sie eis Land chönt wähle wo sie wür welle wohne, dä wärs d Schwiiz, hämer ihre müesse rächt gä. 🙂 Uf de Cardial Intesive Care Unit schafft no en schwiizer Arzt, de isch eus afangs Wuche mal go bsueche, wo er ghört hät das mir us de Schwiiz seged, er hät dä erwähnt, dass er gern Ragusa hät. Mir händ dä s Gotti bäte chli Ragusa mitzneh, woner hüt wieder ineglueged hät, hämerem die gad chöne gäh und er hät sich sehr drüber gfreut.

De Liam hät also en guete Tag gha und hät sich witerhin chöne erhole vo de Strapaze. De Abig hät dä s ganze no chli versüesst, i dem de Liam bissled hät! Das isch es super Zeiche und heisst, dass sini Niere nöd komplett kaputt sind. Das isch e grossi Erliechterig und en Schritt i die richtig Richtig gsi. Und ja, drum natürli au de Titel. 🙂 De Liam hät dä sogar no churz möge d Auge ufmache, wo d Tiffany d Hundewelpe laufe lah hät ufem Fernseh, au eis vo de Relaxation Videos.

Viele Dank für all Kommentär uf de Site und Nachrichte wo mir bechömed, das isch immer en Ufsteller.

Guet Nacht…

Dialysis…

Hüt nur en churze Bricht.

Mit früeh pfuse isch dä nüt gsi. Sin Bluetdruck isch leider witer gsunke und zwar inen Bereich wos am Team dä nüme wohl gsi isch. Sie händs dä miteme Flüssigkeits Bolus probiert, er hät aber gar nöd druf reagiert. All 5 Minute händs de Bluetdruck gmässe, wos gmerkt händ daser eifach nöd ufe wott, händs gseit sie wänd e Arterielli Leitg setze, dass de Bluetdruck permanent mässe chönd. Das isch dä au e stressigi Sach gsi, will d Ärtzin hät de Liam nöd gross welle sediere, mitem tüfe Bluetdruck. Er hät sich aber natürli biz gwehrt, das häts ihre nöd eifacher gmacht und es hät sich dä über fascht e Stund anezoge. Dä händs es miteme Noradrenalin Tropf probiert, wo das au nöd ghulfe hät, händses no mit Adrenalin probiert. Leider hät au das nöd ghulfe. Dä händses mit Steroide probiert, das hät gheisse kei Car-T Zälle i de nächste 7 Täg, sie händs aber müesse gä, sie stönged quasi mitem Rugge zur Wand. Es isch irgend nachem 4i am Morge gsi. Das hät dä zum Glück gwürkt, au wänns chli duret hät, es isch wieder e extrem turbulänti Nacht gsi und de Liam hät sich au nöd würkli chöne erhole.

Am Morge hät sich de Liam gar nöd wohlgfühlt und hät grausami schmerze gha im Buch, er hät sich richtig gwindet. Nachdem er dä Schmerzmittel becho hät, hät er sich dä wieder beruhigt. Und natürli hät er au sehr schnäll gschnufed, sie händen i de Nacht scho an HighFlow ta. Es sind all immerno sehr beunruigt gsi, vorallem will de Liam nüme bisled hät und will gwüssi Bluet Wert erhöht gsi sind, hät das druf hi dütet, dass d Niere nüm richtig gschaffed händ. Das sind alles Themene uf de Visite gsi, sie händ dä scho vo Intubation gredt, eusi Nurse hüt, d Sol, hät dä aber gseit, de Liam seg sehr gstresst gad und mir sölled ihm doch e Change gä zum obe abe cho. Das ischer dä au und er hät dä chli langsamer gschnufed. Es isch am Liam würkli nöd guet gange hüt Morge. S Problem vome tüfe Bluetdruck isch halt au, dass de Organ dä allefalls nüm richtig durchbluetet werded. Es isch en Durstress gsi für eus. Aber wenigstens hät de Liam änltli mal chli rueh becho und hät tüf und fescht gschlafe.

Sie händ dä zimli schnäll mal gseit, dass er ad Dialyse muess, aso e Maschine wo d Funktion vo sinere Niere übernimmt. D Hoffning isch jetzt, dass sini Niere nur agschlage und nöd permanent beschädigt isch, das wird sich wohl dä i de nächste Zit zeige. Ich hoffe ich chum morn dezue chli meh übe die Maschine z verzelle.

D Sol eusi Nurse, hät so e Sicherheit usgstrahled, dass mer eus sogar mal erlaubt händ churz z schlafe.

De Liam häts immer besser gmacht au de Bluetdruck isch stabil gsi aber er isch immerno a de Medis ghange. D Sol häts dä aber immer meh chöne abestelle. De Liam hät aber au relativ viel Bluetprodukt übercho, was sicher au no ghulfe hät. Mir sind aber sehr erliechtered gsi.

De Dave isch dä no go spiele cho wos s Pflaster gwächsled händ. Er spricht sich immer mit de Nurse ab, dass er dänn cha cho. Er isch e mega bericherig für das Spital.

Was de Liam leider nöd mitübercho hät, will er de ganz Tag nur gschlafe hät, isch das s Gotti hüt acho isch. Sie hät sich letscht Wuche entschiede, dass sie verbi chunt und hüt isch sie scho da gstande. Das hät eim dä zuesätzlich ufgstellt. 🙂

Bisled hät de Liam bis am Abig leider nöd und das hät gheisse er muess ad Dialyse. Für das häter aber e neui zentrali Leitig brucht, für das wiederum hät er müesse intubiert werde. Händ mir natürli letscht Wuche im Hinterchopf gha. Aber sini Situation isch hüt e anderi gsi, er isch am Abig dä stabil gsi und sie händ all sini Bluetdruck Medis chöne abstelle. Planed wär de Igriff am 17i gsi, es isch dä aber irgend 18:30 Uhr worde. Mir händ dä müesse warte und es isch eus scho chli mulmig gsi aber es isch zum Glück alles guet gange und sie händ sogar de Schluch wieder chöne zieh.

Leider isch aber sin Bluetdruck dä wieder chli tüfer gsi, nöd so wie gester. Wänn er aber ad Maschine chunt, dä sänkt sich sin Bluetdruck no zuesätzlich und drum wottmer das dä e biz höcher isch als normal. Wills Kalzium jetzt no chli tüf isch, chunter das jetzt no zuesätzlich über, das sött im au no hälfe mitem Bluetdruck ufezcho. Aber für euses Stressfaktor isches nöd so toll, bis jetzt isch er nonig gross gstige aber sie händ au nonig die beide Bluetdruck Medis wieder atkiviert.

So churz ischs jetzt glich nöd gsi aber es hetti no viel zum verzelle gä aber mir sind langsam müed.

Guet Nacht…

Blood pressure…

Es isch eini vo de ansträngernde Nächt gsi. De Bluetdruck isch dä leider wieder abegheit. Er hät dä no paar Flüssigkeits Bolus becho und isch dä au kurzzitig ufe aber au schnäll wieder abe mitem BD. De Liam hät die ganz Nacht durscht gha aber hät nöd würkli döfe trinke und das hätten halbe wahnsinnig gmacht, immerhin Power hät er no gha. Er hät dä irgrndwenn zum Glück paar Schlück döfe ha. Kurzfassig mir händ nur öppe zwei Stund gschlafe und sind am morge all chli kaputt gsi, inklusive Liam. Wo au immerno Fieber gha hät. Entspanne hätmer sich de ganz Tag nie chöne und irgendwie au jetzt nonig, will d Bluetdrück immerno so tüf sind, sie säged sie seged aber nonig gföhrlich tüf und er reagieri immerno guet. Zum ganze ane hät er no Buchweh und Durchfall gha. De Mitchell isch au guet beschäftigt gsi die ganz Nacht und es hät ihn au rächt nervös gmacht, er hetti dä hüt frei gha, hät dä aber gseit, villicht chömi er glich go schaffe und wär dä wieder bi eus. Für eus agnehm will mir ihn und er vorallem de Liam und sini Gschicht kännt.

Uf de Visite isch dä s Manage vo sinere Flüssigkeit s Thema gsi, er isch rächt viel im Plus gsi, dur die ganze Transfusione und d Flüssgkeit vor und nach de Chemo. Eusi Sorg isch eifach gsi, wänn er jetzt scho so gschluched isch, wie söller dä die hütig Chemo guet überstah. D Onkoärztin, wo ab hüt öpper neus gsi isch, hät dä vo sich us gseit, sie segs mitem Team am aluege, was mer chöngi mache. Sie wüssi aber erscht am Namittag meh. Simer biz erliechtered gsi, dass das in erwägig ziend, will sini wisse Bluetkörperli sind nüm nachwiesbar gsi im Bluet.

Er hät viel gschlafe oder probiert z schlafe, so richtig entspanne hät er sich aber au nöd chöne, sie sind dä no es Echo go mache und au susch immer wieder öppis a ihm gmacht und halt immer wieder Windle wächsle. Sin Buch isch wieder riesig gsi, was en sicher au wieder stört bim Schnufe, da sötted aber d Drainage hälfe.

Er hät ja letscht Nacht schlussendlich es Nasevelo becho, mit 0.5 Liter Surstoff, das hät er dä au de Tag dur döfe abbhalte.

Nachem Mittag dä die frohi Botschaft, er bruchi kei Chemo meh, je nachem wies ihm morn gaht, überlegmer sich Car-T Zälle uf de Do vorzzieh aber mal luege. Mir sind uf jedefall brutal erliechtered gsi, dass er hüt eifach mal e Pause überchunt.

Am Namittag häter dä döfe zu de Tiffany uf de Stuehl und hät sich wenigstens mal e biz chöne entspanne. Was im Verlauf vom Tag dä mal abecho isch, isch d Herzfrequenz und au d Atmigsfrequenz, immerhin das mal.

Mir händ dä am Abig mal churz es Stund chöne schlafe wo de Liam au gschlafe hät, er isch völlig kaputt und schlaft jetzt aber schön relaxed und cha hoffentli die Nacht chli durepfuse. Jetzt sötter mal paar Tag chli rueh ha und sich hoffentli chli chöne erhole vo de letschte sehr ansträngende Täg.

De Michtell isch dä am Abig tatsächlich cho, Kendra womer de Tag dur als Nurse gha händ, hät dä gseit, er seg würkli nur wäge eus inecho. Passend hät er es Captain America Libli agha.

Hüt gits de Post mal chli früehner inde hoffnig dasmer bald pfuse chönd.

Guet Nacht…

Fever…

Mir händ eus wieder meh oder weniger abgwächsled i de Nacht, mir händ ja wieder de Mitchell gha und er hät ja gwüsst was z due isch. D Lag isch ebe chli unklar gsi, ob mer am Liam döf Surstoff gä oder nöd, falls er gheit mit de Sättigung, mir händ gmeint ja, d Onko Ärztin hät gseit jein wo sie no bi eus verbi cho isch und schlussendlich isch d Antwort dä nei gsi, usser er cha nüm ohni. Es wär meh drum gange, ihm und eus e ruhigeri Nacht z beschere. Lut Studie, heged Chind wo vor de Infusion Surstoff becho heged, meh müeh gha mit de Car-T Therapie, all uf de ICU säged aber dass das medizinisch nöd viel Sinn macht, dass mer wäge Surstoff chönti meh müeh ha. Egal es isch wies isch und mir müend ihn jetzt da eifach durebringe.

Um die 5i ume hät de Liam dä afange uffiebere und hät nüm würkli chöne schlafe. Sie händ ihm dä Tylenol gä aber würkli gwürkt hät das nöd und mer döfs nur all 4 Stund gä, s andere wos no gha hetted, händsem nöd döfe gä, will sini Bluetplättli uf NULL gsi sind, das Medikament hetti d’Bluetsigsgfahr erhöht. Plättli händ also wiedermal uf ihn gwartet. Das mal hät er aber en erstuhnlich grosse “Bump” übercho und isch uf 53 ufe. Am 4i am Namittag isch dä aber wieder uf 5 une gsi.

Zrug zum Fieber, bis zu de Visite ischer uf 40.2 Grad gstiege, s Tylenol hät no chli müesse warte, drum händs e Chüehligsdecki cho la, die hät dä am Afang aber chli gspunne und hät uf 5 Grad abe küehled, isch dä gad chli gar chalt gsi und de Liam hät gschlottered, das hät aber gad de umgekehrti Effekt womer welle händ, de Körper heitzt dä innerlich no meh. Sie händ das Ding dä aber in Griff becho. Die Chüehldecki hät er scho nachem Herzstillstand gha zum sini Temperatur tüf z bahlte und Hirnschwellige z verhindere.

Uf de Visite sind dä au Plättli und s Fieber es Thema gsi, sie sind devo usgange, dass es vo de Chemo isch, Bluetkulture händs au no abgno, zum allfälligi Infekt uszschlüsse. D Onkoärztin hät dä gmeint, dass sie luegt, dass er d Chemo chli früehner überchunt als gester. D Realität hät dä chli anderscht usgesh, wo eusi Nurse mit de Onkoabteilig Kontakt ufgno hät, häts gheisse 18.30 Uhr.

Sie händ dä müesse e Balance finde wäg de Flüssigkeit, er hät Bluetplättli, roti Bluetkörperli und vor und nach de Chemo insgesamt 6 Stund extra Flüssigkeit ufem Plan gha. Sie händ dä de Tag dur gnau müesse Bilanz füehre wie viel er usgschide hät und wieviel er a Flüssigkeit übercho hät. Hüt ischs no chli komplizierter gsi als susch, sie händ dä vor gha, d Sondenahrig z stope, während dene 6 Stund extra Flüssigkeit, händ aber drum müesse de Glukosespiegel überwache, nöd dass er zwenig hät.

Am Liam isch richtig unwohl gsi und er hät nöd rächt gwüsst wie ligge. Er hät zwar heiss gha aber glichzitig au chalt, wies halt isch wämer Fieber hät. Trinke hät er au nöd gross döfe, wills hüt no chli meh angst gha händ wägem Wasser wo id Lunge chönt glange, dä häts halt wieder Schwämmli gä.

Zur eusere Überraschig hämer hüt nöd d Emily gha, sie isch i de Cardiac Intensive Care Unit (CICU) brucht worde, i de Nacht händs 2 Zimmer näbe eus und ebe uf de CICU Code Green gha. Sie schafft merheiltich uf de CICU und hät drum wieder döt ane müesse go hälfe. Mir händ dä d Kendra gha, d Workout Kollegin vo de Emily. :)D Emily isch eus dä das persönlich go säge und isch de Tag dur no öppe 3 mal verbi cho, zum luege wies eus gaht, sie hät eus glaub richtig is Herz gschlosse. D Erica womer fascht die ganz letscht Wuche gha händ, isch au no churz vebri cho go Hoi säge, sie hät s andere Chind gha wo en Code Blue gha hät die Nacht. Sie hät bös gseit ja üebig gha im Umgang mit so Patiente vo letschter Wuche.

Irgendwie känntmer eus da fängs scho chli, d Empfangsdame isch dä mal no go ineluege und hät ganz ufgregt verzellt, das de Liam ihre hüt morge gwunke hegi, wo sie verbi glofe isch. De Putzma kännt sogar scho mini Eltere, wänns ihn im andere Teil vom Spital gsehnd. 🙂 Aber mer sind ja au scho en Monat Inpatient.

Es isch en toughe Tag gsi für de Liam, ufem Arm vom Mami hät er sich dä wieder chli chöne entspanne, das hät mer dä au wieder gmerkt. D Seifeblase händem sogar es halbs Lächle chöne abgwünne aber nöd für lang.

Sini Sättigung hätter super chöne hebe, sind Puls isch defür zwüsche 160-170 gsi, zimli sicher vom Fieber. Er häts sich aber duregschlage und ab und zue mal chli chöne schlafe, das hättem wohl am beste ta. Susch hämeren so guet s gange isch probiert abzlänke, zum Bispiel i dem er sälber sini Schwämmli im Wasser hät chöne dunke. Es isch immer öpper a sinere Site gsi.

Am Abig, sogar scho am 6i, sind dä wieder 2 Onko Nurses cho zum d Chemo ahänke, zerscht die glich wie gester und dä e halb Stund spöter die ander Chemo. Bis die ineglofe isch, isch dä au de Mitchell wieder itrudlet.

Es isch au wiedermal Zit worde für es Bild. Am Liam gfallt mini no neui Frisur übrigends immernonig bsundrigs.

Während ich da am schribe gsi bin, hät de Liam wiedermal gmacht, was er halt guet chan. Lüt chli schocke, sini beide Chemos hät er dine gha, es isch no d extra Flüssigkeit und Bluetplättli glofe. Sini Atmigsfrequenz isch dä vo 45 plötzlich uf 70, sini Sättigung isch under 90 gheit obwohl er Wach gsi isch und am Fernseh luege und a sine Lippe am umezieh gsi, vorallem isch aber au sin Bluetdruck starch gheit, vo 115/60 (68) uf 80/40 (50) oder um das ume.

Für es Chind vo sim alter eigentli ok aber für ihn sehr tüf. De Mitchell isch dä rächt beunruigt gsi und mir dä au. Es sind dä schnäll mal wieder es paar Nurses und e Ärztin im Zimmer gstande. Niemer hät dä so rächt gwüsst wieso. E Reaktion uf d Plättli, vo de Chemo, wäg de Flüssigkeit. Sie händ dä no es Echo gmacht mittere chline Maschine, wos da uf de Station händ. Mit dere gsehtmer aber nöd so guet dur d Pflaster, uf de erst Blick hät er aber gmeint gsech er nüt wonen beunruigt. Er welli aber no es Röntge vo de Lunge mache la und es richtigs Echo vom Herz, nur zum sicher gah. Er hät dä au nomal gseit, das seged eigentli gueti Bluetdrück, eifach ussergwöhnlich für de Liam. De Bluetdruck isch dä all 5 Minute gmässe worde und mir sind natürli vorem Monitor gsässe wie die pickte. Das sicher e Stund lang. Mit de Zit händ sich die aber wieder chli bessered, sini Sättigung hät sich mit ganz wenig Surstoff, wo ihn chli ablöseled hät, au wieder normalisiert, wie au d Atmig. Er isch dä eh igschlafe und isch ganz relaxed gsi. Mir definitiv nöd. Chönd ja nöd z lang ohni Ufregig si. Fieber hät er au immerno sehr höch, 41 Grad, chunt aber jede Moment wieder s Mittel über. Ich müesst glaub würkli nüm lang warte und mini Haar würded in natura so usgseh.

Guet Nacht…

Conditioning…

Danke vielmal fürs Dumme drucke es schint ghulfe zha. 🙂

D Tiffany und ich händ eus die Nacht abgwächsled zum luege, dass de Liam au nie gross d Chance hät unter 90% Sättigung zgheie, de Mitchell hät au non-stop es Aug uf ihn gworfe und chum isch de Liam bi 90% gsi, isch er im Zimmer gstande und isch parat gsi zum ihn chli z bewege, dass er cha hueste. Am beste häts aber de Liam sälber gmacht, er hät sich ächt guet ghebet, er isch zwar es paar mal gsunke aber dä au gad wieder ufe.

D Visite hät nöd viel Neus bracht, de Plan isch immerno de glich gsi, solang sich de Liam cha hebe, chunt er d Konditionierig über. Sie verfolged au immerno s Ziel ihn möglichst troche z halte aber ebe au nöd zu troche. D Dr. Tarlock hät dä gmeint, dass d Chemo erscht am Namittag parat seg, mir händ dänkt er chöm die dä gad über, wänn er die 24h gschafft hät. Aber s Ziel isch ja eigentli eh, dass er bis zu de Infusion kei Surstoff meh brucht.

Obwohl de Liam doch es paar Mal gweckt worde isch die Nacht, isch er scho am Morge erstunlich guet druf gsi und hät sogar es Lächle chöne über d Lippe bringe. Seifeblase verplatze, hätem au freud gmacht. Was gits schöners, als so in Tag z starte.

Will de Götti ja nüme da isch und vo Downtown feini Gipfeli und Kaffi cha bringe, händ das hüt s Grosi und de Grosspapi überno.

De Liam isch aber scho sehr müed gsi und mer hättem scho chli agmerkt, dass er nöd so super duregschlafe hät die Nacht. Aber wänn er wach gsi isch, ischer fokusiert und verhältnismässig fit gsi.

Mir händ natürli wieder d Emily gha, wo sie cho isch, hät sie gseit, sie heg so viel a eus müesse dänke die Nacht und hät d Tiffany gad no umarmt.  🙂 So süess. Zu ihrere liebevolle Art, chunt no en super tochne Humor dezue. 😀

Am Mittag sind dä Katie und Matt verbi cho und händ eus natürli au wieder öppis Süesses mitbracht, das mal sälber gmachts Bananabread und Bier us de Brauerei wo sie beteiligt sind aber ich glaub das müemer dä Dihei trinke, Alkohol isch da strikt verbote. Während d Fraue go käffele sind, hät d Männerrundi uf de Liam ufpasst.

Ich hanen dä nomal uf de Schoss gno, zum ihn chli animiere, er hät nonig gross öppsi uselah zu dem Zitpunkt und das schinten gstört z ha, gester hät das ja uf die Art super klappt. De Liam isch dä schnäll mal uf mim Arm ipfused, bi mir ischs au nöd lang gange, de Matt isch glaub mit mir no am rede gsi aber ich ha mi nüm länger chöne wehre und bi churz ignickt. Aber nur es paar Sekunke, quasi es super quick Power Nap. De Grosspapi hät dä no chli mit Air BnB z kämpfe gha oder besser gseit Air BnB händ mit ihrem System, mini Eltere händ ja au ihri Wohing müesse verlängere, nach langem hi und her und öppe 25 Mails und jenschte Telefon häts dä klappt. Min Vater isch aber kein grosse Fan meh vo Air BnB. 🙂

D Dr. Tarlock isch dä i dere Zit au no gad verbi cho und häts super gfunde, dass de Liam mal chli usem Bett chunt.

Zum Glück ha ich e Unterlag uf mir gha, will wie gester, häts usem Bett cho guet ghulfe und er isch usglofe. Aber Hauptsach das Züg isch dusse und ihm isch wohler gsi nachher. Das schint für vieli wahrschinli komisch z si, dass mir das so erwähned aber es isch super wichtig, dass sini Verdauuig guet funktioniert und sin Buch dur das nöd no grösser wird.

De Liam hät de ganz Tag nöd welle Fernseh luege, nöd mal Zootopia oder Robin Hood, defür isch er immer für es paar Seifeblase z ha gsi, Büechli vorläse isch au höch im Kurs gstande.

Am halbi 6i sinds dä äntli vo de Cancer Care Unit cho und händ am Liam Fludarabin Chemo aghänkt. Das isch s gliche Mittel wie er vor 4 1/2 Wuche übercho hät. Lut Plan sött er dä morn und übermorn nomal Fludarabin und no Cyclophosphamid übercho. Bim zweite Medikament, wird mer jewils amigs no gschwämmt, wills schädlich für d Blase cha si. Will er aber so Flüssigkeitssensitiv isch, wird er wohl nur wenig zuesätzlichi Flüssigkeit becho, defür aber no en Art Blaseschutz. D Frau Dr. Tarlock hät das mit de Pharmacy abklärt. Während die zwei Okno Nurses d Chemo aghänkt händ, hät d Emily chli Seich mitem Liam gmacht und am Liam schints z gfalle z ha. Sie hät s Ice (sorry Iis gseht eifach komisch us) mittlerwile broche, oder er isch eifach langsam wieder chli besser druf gsi. Er hät immer wieder mal chli möge gigele, wo das d Emily s erscht mal gseh hät, isch sie schier abe, so seger ja no süesser. 😛

Mir händ hüt wieder mal Burger bstellt und ganz unverhofft, hät de Liam es Pommes Frites welle, er hät sogar chli dra umegnaged. 🙂 Alles gueti Zeiche. D Haayoung und Emily sind au gad chli bi eus gsi und händ chli mit eus gschnädered. Mer hät sich richtig wohlgfühlt.

Vorem Schlafe hät de Liam dä glich no wenigstens ein Film welle luege, ganz ohni hät er dä glich nöd chöne si. Er isch au de ganz Tag rächt durschtig gsi, sie händ aber chli angst gha, dass er sich chönt verschlucke und so Wasser id Lunge glangt, drum hämer immer müesse ufpasse und de Liam hät sich voll müesse ufs Trinke konzentriere. Vieli so chlini Sache, mer wott nüt am Zuefall überla. D Frau Dr. Tarlock isch dä au no e dritts mal cho und hät gseit sie klärt no ab inwiefern mer de Liam döfi unterstütze i de Nacht. Sie isch aber sehr zfriede gsi mitem, wie au mir.

Am Abig isch dä wieder de Mitchell cho, er isch e Travelnurse, isch also jewils nur paar Mönet a eim Ort. De Liam hät dä scho bald mal gschlafe, woner in Tüfschlaf gheit isch, ischer au mit de Sättigung chli gheit aber ohni das mir ihn gstuppst händ, ischer dä wieder sälber ufecho. Aber mal luege wies jetzt die Nacht isch, so richtig entspannend ischs weder für ihn no für eus wänns immer alarmed i de Nacht, wänn er churz unter 90% gheit. Was ihn aber letscht Nacht ein zwei mal au gweckt hät, isch sin Schleim gsi im Hals, das hätten dä leider au wieder dezue bracht, dass er hät müesse bräche aber er isch nachher jewils erliechtered gsi.

Es isch en guete Tag gsi, obwohl de Liam eigentli de ganz Tag rächt schlöfrig gwürkt hät, isch er am Abig richtig uftaut, er überrascht eus immerno öfters.

Bi eu muesses ja rächt chalt si, trotzdem en guete Start id Wuche!

Guet Nacht…

Room Air…

E witeri gueti Nacht. Am Wuchenend simer amigs e chlineri Rundi bi de Visite. Mir händ aber wieder d Emily gha. Simer froh gsi, sie hät das so super gmacht gester, obwohl ja all guet sind. De Tom isch dä die letschte 24 Stund duregange. Nachher ischs um die nächste 24 Stund gange, de Attending Arzt hät dä gfunde sini Lunge seg so troche wie scho lang nüm (troche isch guet) und sin Buch seg au chli, e bessers Fänster werdemer wohl nöd ha, er würis probiere durezieh. Mir sölled ihn möglichst viel bewege hüt und wämer das mached ihn probiere vom HighFlow zneh und luege wiener reagiert. De HighFlow händs dä no welle uf 6 Liter abe stelle. Sini Bluetplättli frisst er immerno uf und brucht jede Tag en grosse Bütel. D Flüssigkeit isch au wieder es Thema gsi, en schmale Grat, sie wänden troche bhalte wäg de Lunge, willer dä besser schnuft aber natürli au nöd zu troche. Sini Sondenahrig händs uf 30ml ufestelle lah.

De HighFlow händs dä gad nach de Rundi abegstellt, für es Chind vo sinere grössi seg das eh nüme viel hät d Emily gseit. Es seg hüt eifach wichtig ihn guet z bewege will ihm das au hilft z hueste und das sini Atemwäg frei macht.

Hüt isch wieder ganz speziells Wätter gsi, am Morge häts gschneit, dä grägnet und dä blaue Himmel. 🙂

S Grosi und Corinne sind guet Dihei acho, sogar ohni Umwäg. S andere Grosi und de Grosspapi sind dä au wieder im Spital gsi, eigentli händs no id Stadt welle aber s Wätter isch döt gad nöd so amächelig gsi.

D Emily isch Füür und Flamme gsi mit eusem Ziel de Liam usem Bett zbringe, das hämer dä au gmacht. Er isch dä wieder zum Mami uf de Stuehl, muess ihm wohl gsi si, will gstuehled hät er au no gad heftig. D Emily hät sich gad de rächt Moment für e Pause usgsuecht, so hät d Jen ane müesse, sie isch Risk Nurse und isch paar mal zueständig gsi, wo mir uf de Onko Abteilig gsi sind. Aber alles egal, viel wichtiger, sie händ ihn abem HighFlow gno. Er isch also ohni Unterstützig gsi, s erst mal sit 4 1/2 Wuche (usser döt churz emal im 8. Stock). Mal luege wie ers macht, hämer dänkt. Zur Abklänkig isch dä d Kennon wieder cho, sie hät au tatsächlich ihres Liederbuch debi gha und fliessig für de Liam gspielt. D Jen hät dä au gad no chli zueglost. Ihri Stimm isch ächt guet! Er isch dä e Zitli uf de Tiffany ghöckled und häts super gmacht und hät sich so um die 94 ghebed.

Irgendwänn hät de Liam dä glich zrug is Bett welle, döt händen dä s Grosi und de Grosspapi unterhalte, er hät sogar chli möge spiele und das ohni Surstoff, es Lächle isch au no dine gläge, beeidruckend.

D Emily isch ihn konstant am beobachte gsi und au sie hät eus tatchräftig unterstützt, dass de Liam das durehaltet. Wie spöter usecho isch, isch guet das mer ihn nöd gad wieder an HighFlow ta händ. Er händ eigentli au glich witergschnufed, villicht minim meh agsträngt aber sogar im Schlaf hät er sich chöne hebe. Hettemer beidi nöd dänkt, dass er das so guet macht.

Mit de Emily hämer dä au no chli über Chnochemark Transplantatione gredet. Sie isch dä au wieder e biz schockiert gsi womer verzellt händ wies i de Schwiiz lauft, da würeds uf d Barrikade hät sie gseit. De Oberarzt hät sich dä au no id Diskussion igschalte. Sie hegeg das vor Jahre au no so gmacht aber Studie i de USA heged zeigt, dass die meiste Infekt vom Chind sälber chömed und das chöngi mer mit so stränge hygniene Massnahme für Dritti nöd verhindere.

D Haayoung isch eus dä au wieder go bsueche cho, sie isch au ganz e Treui.

Geg de spöter Namittag hämeren dä nomal usegno und ich ha das Mal s vergnüge gha ihn ufem Schoss zha. Weiss nöd wänen s letscht Mal so nöch bi mir ha chöne ha, uf jede Fall schön gsi. D Kennon isch dä au nomal cho und hät chli gspielt, mer hät s Gfühl gha, de Liam heg dä chli chöne entspanne. Büechli vorläse hätem au pässled. D Emily hät dä au no zume Föteli igwilligt, weiss nöd obmers gseht aber die letschti Zit hät glaub mini Haar rächt ergraue lah. 😛

Grosi und Grosspapi händ wieder Mal de Lieferdienst für eus gmacht und eus öppis Znacht bracht. Sie wäred morn eigentli wieder Hei gfloge, händ jetzt aber nomal um 2 Wuche verlängered. Mir sind froh, will es wird e intensivi Wuche.

Es isch also mittlerwile Abig gsi und de Liam hät immerno kei Surstoff brucht, het niemer vo eus erwartet. Mir sind richtig stolz uf ihn gsi. Nacheme Monet woner immer unterstützig gha hät und vorallem nur 6 Täg nach sim Herzstillstand, verblüffend. Das hät dä au d Frau Dr. Tarlock gfunde, sie hät ihm das nöd zuetraut, jetzt ischs Ziel gsi das no witer dure z zieh. Sie hät gseit wänn er 24h durehebt, dä chöngeds scho morn mit de Konditionierigschemo afange, statt erscht am Mäntig. Das wär natürli en riese Schritt i die richtig Richtig. Sie hät dä no gseit, dass d ICU die ganz Zit probiert es Schlupfloch z finde zum de Liam da durebringe. Sie welled immer wieder wüsse was dä jetzt Room Air gnau heissi, ob er dä nöd glich no chli Surstoff döfi dänn. Sie hät dä betont, dass sie au unbedingt wänd, dass er die Zälle überchunt aber sie sich au ad Richtlinie vo de Studie müend halte und dass er sie ime guete Zuestand überchunt. De Liam hät dä wieder gmacht, was er guet cha, chli Drama dri bracht, wo sie no döt gstande isch, ischer mal churz uf 87 abe gheit mit de Sättigung. Mir händen dä aber chli bewegt und er isch gad wieder ufegspickt uf über 90%, sie hät dä gmeint ja das seg sicher wäg de Positionierig gsi. D Emily hät eus versicheret sie werdi de Mitchell beufträge, dass er die ganz Nacht lueget, dass er über 90 blibt, i dem er ihn chli bewegt und ihn zum hueste bringt.

De Tom hät hüt sini 24h Schicht und isch dä no chli go pläuderle cho, mit sinere lockere witzige Art, bringter eim immer zum lache. Was mich dra erinnered, de Dr. Faucette (dä mit de Witz) isch eus gester au no go bsueche cho, er hät eus dä zerscht aber gfröget wies eus so göngi, woner gmerkt hät, dass eus eigentli ganz guet gaht, hät er sini Olympia Witz loslah. 🙂

Optimal wär jetzt natürlich, wänn er bis zu de Car-T Infsuion wo am Fritig wär, kei Surstoff meh brucht, wänn er aber nach de Konditionierig mal churz an Surstoff müessti wird das sicher gah, er muess eifach sicher wieder 24h vor de Infusion ohni Unterstützig si. Jetzt muener aber zerscht mal die Nacht guet durestah. De Michtell git sich aber alli müeh, dass hämer jetzt scho gmerkt, er machts super.

Drucked de Dumme, dass de Liam morn sini Chemo cha übercho und das Mal en erste Schritt wird si zum eigentliche Ziel, de Car-T Zälle.

Guet Nacht…

Extubate…

Mir händ eigentli all 3 wieder guet pfused, bis amigs so am 6i, ab dänn tröpfled all langsam ine, d Ärzt wo vor de Visite no wänd de Liam aluege, d Schnufpolizei, d Nurses wo no übergab mached. So simer au sicher scho immer wach, wänn am 8i d Visite losgaht.

Am Afang verzellt de Resident Arzt, im Moment de Tom, dä immer wer de Patient isch. Am Afang isch das e churzi Sach gsi, de Liam euse 2 jährig relapse ALL Patient. Aso so quasi sini “Highlights” zähleds uf woner alles scho gha hät. Mitterwile tönt dä das ehner so, Liam 2 jährig, relapse ALL, Flüssigkeitsüberschuss, partielli Blockade im Buch, Flüssigkeit um Herz und Lunge, grossi Asammlig vo Flüssigkeit im Buch, Herzstillstand. Villicht hani au no öppis vergässe, ich lose morn nomal gnau ane. Sie händ ja i de Nacht sini Sondenahrig gstoppt, dass sie allefalls de Schluch chönd zieh, das isch dä au s Hauptthema gsi. Sie welled wieder mit de Maschine teste, obers vertreit. D Apassige sind dä sogar scho vor de Visite gmacht worde.

De Liam isch dä scho vor de Visite am Zootopia luege gsi und am sim Dume am umechnüble, es stört en amigs wäner es Hütli döt hät.

Über d Nacht häts sogar chli Schnee gä, i de letschte Täg häts immer mal wieder gschneit aber nie möge hebe. D Corinne und de Tiffany ihri Muetter sind am morge au wieder uf Bsuech cho. Mini Eltere sind churz vorem Mittag cho, so hätmer sich chli chöne abwächsle. De David isch dä go ineluege cho aber will de Liam gad tüf am pfuse gsi isch, hät er gmeint er chömi lieber spöter nomal. Er luegi susch das er chöngi cho, wänns s Pflaster wieder wächsled, dass heg am Liam ja letscht mal ghulfe. Er git sich alli müeh.

Sini Vitalwert sind immerno super gsi, Bluetdruck, Puls, Atmigsrate au mit de neue istellige, das isch vielversprächend gsi. Sie händ dä entschiede de Schluch z zieh. Sie händ dä nomal gseit, dass au chöngi sie, das de Liam wieder müessi intubiert werde, will mer wüssi halt nie wie s Chind dä würkli demit umgaht aber vo de Wert her, gsehchi alles guet us.  Es isch dä eigentli alles parat gsi, nur de Oberarzt hät no gfehlt. Es sind dä doch paar Lüt wieder im Zimmer gstande, d’Erica, nomal e Nurse, eine vo de Atmigstherapie, de Resident, de Fellow und de Attending Arzt. Und mir zwei natürli. Obwohl eus scho chli mulmig gsi isch aber de Liam isch ja voll wach gsi und hät uf eus zählt. Es isch dä e churzi Sach gsi, Chläber weg und Schluch usezieh, de Liam isch dä glaub rächt verschocke und hät sich dä rächt möge wehre, wos ihm de HighFlow händ welle anetue. Aber das isch ja e guets Zeiche, das händ au all im Zimmer gfunde. Ich ha dä no chli mitem Tom gredet, er isch en riese Tennis Fan und häts chum chöne glaube, dass de Fedi mal euse Nachber gsi isch. Mir händ dä allgemein chli über Sport gredet, sehr interessant gsi, coole Typ womer au guet mal chli Smalltalk cha mache. 🙂

Pünktlich am 1 isch dä de David mit sinere Ukulele da gstande und d Erica isch au ready gsi für de Verbandswächsel, sie probiered jetzt immer wieder öppis neus us, will ja Drainage vom Herz so rünnt. De David hät dä freud gha, wo er de Liam so gseh hät, viel besser zwäg als am Zischtig no. De Liam hät immerhin sini Rassle möge hebe und er häts wieder gnosse chli zuezlose. D’Erica hät in rueh chöne ihre Verbandswächsel mache und de Liam hät nüt degliche ta.

Sie händ de Liam dä natürli wieder chli änger beobachtet aber sini Wert sind immerno all guet gsi au ohni Schluch, er isch am HighFlow bi 10 Lite und 30% Surstoff gsi. Mitem Surstoff sinds dä aber relativ schnäll abe und händ die ideal Istellig gsuecht, das isch dä schlussendlich am Namittag 28% gsi am Abig 25%.

D Corinne und de Tiffany ihri Muetter händ natürli au no es Föteli welle mache bevors morn wieder abreised. Es isch natürli schad, dass schowieder gönd aber mir sind sehr danbar, dass sie da gsi sind zum eus i dere turbulente Zit z unterstütze.

D Onko Ärztin isch dä am Namittag nomal cho und isch natürli sehr z friede gsi, dass de Schluch dusse gsi isch und de Liam das so guet macht. Sie gäbed jetzt die Nacht nomal Kortison und morn luegeds dä wies am Liam gaht, wänn er witerhin so guet zwäg isch, dä chönds stoppe und allefalls am Mäntig mit de Chemo afange und ändi Wuche Car-T Zelle gä, so gseht emal de Plan vo ihne us, ob de Liam da glicher Meinig isch, werdemer dä wohl gseh. Aber dass mer so churz nachem Herzstillstand überhaupt scho drüber redet, isch eifach nur WOW. Mir ghöred immer wieder, dass de Liam en riese Kämpfer muess si, so schnäll wie er jetzt Fortschritt gmacht hät.

Chli spöter isch dä d Dr. Hailey eus no go bsueche, sie isch eusi Resident Ärztin gsi, bevor mir s erst Mal id ICU sind. Sie hegi ghört was passiert seg und hät eus zerscht mal gad umarmt. Sie hegi ihre Wecker hüt extra früehner gstellt, sie fangi jetzt gad ihri Nachtschicht a. So öpper liebs.

Am Abig hät de Liam dä no chli zum Mami uf de Schoss döfe, er isch immerno chli traumatisiert gsi vom extubiere, hät mer emal de Idruck gha. Er hät sich dä aber chöne entspanne und isch dä churz drufabe is Bett go pfüsele, wieder en ereignissriche und für ihn sicher au stressige Tag. Er isch dä richtig platt gsi, für de Gschmack vo eusere Nachtnurse Kelsey chli zu fest. Sie hät ihm probiert id Auge z lüchte, erstens hasst er das und druckt d Auge dä amigs extra zue und zweitens ischer würkli eifach kaputt gsi. Uf jede Fall isch dä plötzlich d Resident Ärztin im Zimmer gstande und hät gmeint, dass d Nurse zu ihre cho isch mit chli Bedänke wägem Liam, willer so müed segi, sie hegi dä spontan gseit, ja es segi ja au Nacht. 😛 Es isch scho 9i gsi und normalerwies schlaft de Liam dä. Mir händ dä au gseit, es seg en asträngede Tag gsi und es seged immer wieder Lüt cho ihn go untersueche und alles. Vorallem heg er ja au immerno Chräbs und seg sicher gschwächt, mir ewartet vo ihm jetzt nöd, dass er um die Zit no ufem Bett umenand tanzt. Sie hät dä au gseit, sie hegi kei Bedänke und am 10i werdi eh nomal Bluet gno und würeds e allfälligi Abnormalität gseh. Aber mir sind ja froh wänn d Nurses so ufmerksam sind und ihri Bedänke mälded. Vo de Vitalwert her isch de Liam immerno super unterwägs gsi, d Bluetgas ergäbniss händ dä au zeigt, dass vo dere Site her alles guet isch.

Mir händ eus dä scho langsam fürs Bett parat gmacht, dä staht plötzlich d Anna im Zimmer, eusi Nurse vom 8. Stock. De Liam hät ja leider scho pfused aber au sie hät eus zerscht mal umarmt wo sie ghört hät was passiert isch. Sie heg sich gwundered wo mir seged aber erscht jetzt erfahre, dass mir da une seged, mir händere dä alles verzellt. Sie hoffi, dass mer bald wieder ufe chömed und sie eus dä döfi betreue. So nett, dass sie eus extra go bsueche isch.

Jetzt isch irgendwie doch au scho wieder 12i gsi und Zit zum schlafe.

Guet Nacht…